ଓଡ଼ିଶା ଡଟ୍ ନ୍ୟୁଜ୍5/04/2025 at 11:26 AM
ଢେଙ୍କାନାଳ: ଦୁଇ ସାଙ୍ଗ ଡକା ଡକି ହୋଇ ଜଙ୍ଗଲକୁ ଶିକାର କରିବାକୁ ଗଲେ । ହେଲେ ରାତି ଅନ୍ଧାରରେ ଜଙ୍ଗଲ ଭିତରେ ଜଣେ ସାଙ୍ଗ ଶିକାର ଭାବି ଅନ୍ୟ ସାଙ୍ଗର ମୁଣ୍ଡକୁ ମାରିଲା ଗୁଳି । ଘଟଣା ସ୍ଥଳରେ ହିଁ ଟଳି ପଡ଼ିଲେ ସାଙ୍ଗ ଜଣଙ୍କ, ଚାଲିଗଲା ଜୀବନ । ଏମିତି ଘଟଣା ଘଟିଛି, ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ମାନପୁର ଗାଁରେ । ପୋଲିସ ୪ ଜଣଙ୍କୁ ଗିରଫ କରିଛି । ସେପଟେ ବାସ୍ତବରେ ଏହା ଆକସ୍ମିକ ଦୁର୍ଘଟଣା ନା ଯୋଜନାବଦ୍ଧ ହତ୍ୟାକାଣ୍ଡ, ସେ ନେଇ ଖୋଳତାଡ଼ କରୁଛି ରାସୋଳ ଥାନା ପୋଲିସ ।
ଗୁରୁବାର ରାତି ପ୍ରାୟ ୧୦ଟା । ମାନପୁର ଗାଁର ୪ ସାଙ୍ଗ ସନ୍ତୋଷ ନାୟକ, ନରେଶ ସ୍ୱାଇଁ, ବାବୁଲା ନାୟକ ଏବଂ ପ୍ରଶାନ୍ତ ନାୟକ ସବୁଦିନ ପରି ଗାଁ ପାଖ ଜଙ୍ଗଲକୁ ଯାଇଥିଲେ ଶିକାର କରିବାକୁ । ଆଉ ଶୀକାର କରୁ କରୁ ଶିକାରୀ ପ୍ରଶାନ୍ତ ନାୟକଙ୍କ ଗୁଳିରେ ଟଳି ପଡ଼ିଥିଲେ ସାଙ୍ଗ ବାବୁଲା ନାୟକ । ବାବୁଲାଙ୍କ ପରିବାର ଲୋକଙ୍କ ଅଭିଯୋଗ, ଗତକାଲି ରାତିରେ ଜନ୍ତୁ ଶିକାର ପାଇଁ ବାବୁଲାଙ୍କୁ ଜଙ୍ଗଲକୁ ଡାକି ନେଇଥିଲେ ଅନ୍ୟ ୩ ସାଙ୍ଗ । ଆଉ ଯିବାର କିଛି ସମୟ ପରେ ଗୁଳିରେ ବାବୁଲାଙ୍କୁ ମୃତ୍ୟୁ ହୋଇଥିବା ପରିବାରକୁ ସୂଚନା ଦେଇଥିଲେ । ପରେ ପରିବାର ଏନେଇ ରାସୋଳ ପୋଲିସକୁ ଖବର ଦେବାରୁ ବିଳମ୍ବିତ ରାତିରେ ଜଙ୍ଗଲକୁ ଯାଇ ମୃତଦେହ ଉଦ୍ଧାର କରିଥିଲା ପୋଲିସ ।
ପ୍ରଶ୍ନ ଉଠୁଛି, ନିୟମିତ ଶୀକାର ପାଇଁ ଜଙ୍ଗଲ ଯାଉଥିବା ବୃତ୍ତିଗତ ଶୀକାରୀମାନେ ମଣିଷ ମାରିବା ଭଳି ଭୁଲ କଲେ କେମିତି ? ଏହା ଏକ ଆକସ୍ମିକ ମୃତ୍ୟୁ ନା ଯୋଜନାବଦ୍ଧ ଷଡ଼ଯନ୍ତ୍ର ? ବାବୁଲାଙ୍କୁ ହତ୍ୟା ପଛରେ ଆଉ କିଛି କାରଣ କିମ୍ବା ଆଉ କାହାର ହାତ ରହିଛି କି ? ରାସୋଳ ପୋଲିସ ଘଟଣାରେ ୪ ଅଭିଯୁକ୍ତଙ୍କୁ ଗିରଫ କରିଛି । ସେହିଭଳି ହତ୍ୟାରେ ବ୍ୟବହୃତ ବନ୍ଧୁକକୁ ଜବତ କରି ଘଟଣାର ରହସ୍ୟ ଭେଦ ପାଇଁ ତଦନ୍ତ ଚଳାଇଛି । ଏପଟେ ପରିବାରର ଏକମାତ୍ର ରୋଜଗାରିଆ ବ୍ୟକ୍ତିଙ୍କୁ ହରାଇ ବେସାହାରା ହୋଇ ପଡ଼ିଛନ୍ତି ବାବୁଲା ନାୟକଙ୍କ ପରିବାର ।