ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

19/04/2025 at 6:29 AM

ରାଜଧାନୀରେ ଦୃଷ୍ଟିବାଧିତ ମହିଳାଙ୍କ କୋଳରୁ ଛୁଆ ଛଡାଇ ନେବା ଘଟଣାରେ ନୂଆ ମୋଡ଼ । ଦେଢ଼ମାସର ପୁଅକୁ ଚୋରି କରିବା ଏବଂ ପରେ, ମହିଳାଙ୍କ ହାତକୁ ଟେକି ଦେବା, ଏହି ସମ୍ୱେଦନଶୀଳ ଘଟଣାର ଖୋଳତାଡ ପରେ, ସାମ୍ନାକୁ ଆସିଥିଲା ସତ । ଅଭିଯୁକ୍ତ କେଦାରସେନ ପଣ୍ଡାକୁ ସିସିଟିଭିରେ ଛୁଆ ଚୋରି କରିଥିବା ଦେଖିବାକୁ ବି ମିଳିଥିଲା ।

କେଦାରକୁ ଗିରଫ କରିବା ପରେ, ସେ ଛୁଆଟିକୁ ଝେଲମ ପଣ୍ଡାଙ୍କ ପାଇଁ ଚୋରି କରିଥିବା ବି କହିଥିଲା । ହେଲେ, ଏହି ଘଟଣାରେ ଝେଲମକୁ ସାକ୍ଷୀ ବନାଇ, ପୁଲିସ ଛାଡ଼ି ଦେଇଥିଲା । ଝେଲମଙ୍କୁ ପୁଲିସ କ୍ଲିନଚିଟ୍ ଦେଇ ଛାଡ଼ି ଦେବା ଘଟଣାକୁ ଅତି ସାଙ୍ଘାତିକ ବୋଲି କହିଛନ୍ତି ପୁର୍ବତନ ପୁଲିସ ଡିଜି ।

ସଞ୍ଜୀବଙ୍କ କହିବା କଥା ହେଉଛି ଆଇନ ଅନୁସାରେ, ଯିଏ ଶିଶୁକୁ ଚୋରି କରିଥିଲା ଓ ଯାହା ପାଇଁ ଚୋରି କରାଯାଇଥିଲା ଉଭୟ ସମାନ ପରିମାଣରେ ଦୋଷୀ । ଝେଲମ ପଣ୍ଡାଙ୍କ ପାଇଁ ଶିଶୁଟିକୁ ଚୋରି କରାଯାଇଥିବାରୁ ଝେଲମଙ୍କୁ ମୁଖ୍ୟ ଷଡ଼ଯନ୍ତ୍ରକାରୀ ହିସାବରେ ବିବେଚନା କରିବା କଥା ।

ଏଠାରେ ପ୍ରଶ୍ନ ଉଠୁଛି-
– ଝେଲମଙ୍କୁ ସାହାଯ୍ୟ କରିବାକୁ ଯାଇ ଫସିଗଲେ କି କେଦାର?
– ଶିଶୁ ଚୋରି ପଛରେ ହୋଇଥିଲା କି ଟଙ୍କା କାରବାର?
– କେଉଁ ସତ ପୁଲିସ ଆଗରେ ଲୁଚେଇବାକୁ ଡରିଲା କେଦାର?
– କେଦାର ପଛରେ ଥିବା କିଏ ସେହି ଗଡଫାଦର୍‌?