ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

20/06/2025 at 5:45 AM

ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଜଗନ୍ନାଥଙ୍କୁ ନେଇ କରି ଚାଲିଛନ୍ତି ରାଜନୀତି । ଦିଘା ସମୁଦ୍ର କୂଳରେ ତିଆରି କରିଥିବା ଜଗନ୍ନାଥ ମନ୍ଦିରକୁ ‘ଧାମ’ କହୁଥିବାବେଳେ,ରାଜ୍ୟରେ ଆରମ୍ଭ କରିଛନ୍ତି ପ୍ରସାଦ ପଲିଟିକ୍ସ ।

ନିର୍ବାଚନ ପୂର୍ବରୁ ଖେଳିଛନ୍ତି ହିନ୍ଦୁତ୍ୱ କାର୍ଡ । ନିଜ ରାଜ୍ୟରେ ଥିବା ୨୩ ଟି ଜିଲ୍ଲାକୁ ପଠାଇଛନ୍ତି ଦିଘା ଜଗନ୍ନାଥ ମନ୍ଦିରରେ ତିଆରି ଖୁଆ ପେଡା । ଏହାକୁ ମହାପ୍ରସାଦ କହି ପ୍ରତି ଘରେ ଘରେ ପହଞ୍ଚାଇବାକୁ ପ୍ରତି ବ୍ଲକ ଅଧିକାରୀଙ୍କୁ ନିର୍ଦେଶ ଦେଇଛନ୍ତି । ସେହିଭଳି ଚଳିତ ବର୍ଷ ବିଶ୍ୱ ପ୍ରସିଦ୍ଧ ରଥଯାତ୍ରା ସମୟରେ ପୁରୀ ତୀର୍ଥସ୍ଥଳୀକୁ ତାଙ୍କ ମନ୍ତ୍ରୀ ଏବଂ ବିଧାୟକମାନଙ୍କୁ ଆସିବାକୁ ବାରଣ କରିଛନ୍ତି। ଏଥିପାଇଁ ସେ ଏକ କଠୋର ନିର୍ଦ୍ଦେଶ ଜାରି କରିଛନ୍ତି ବୋଲି ଅଭିଯୋଗ ହୋଇଛି। ଏନେଇ ପୁରୀରେ ପ୍ରଭୁ ଜଗନ୍ନାଥଙ୍କ ମୁଖ୍ୟ ସେବକ (ବଡ଼ଗ୍ରାହୀ) ଜଗନ୍ନାଥ ସ୍ୱାଇଁ ମହାପାତ୍ର ସୂଚନା ଦେଇଛନ୍ତି । ଓଡିଶା ପରିବର୍ତ୍ତେ ସେମାନଙ୍କୁ ଦୀଘାର ଜଗନ୍ନାଥ ମନ୍ଦିର ଯିବାକୁ କୁହାଯାଇଛି, ଯାହା ଓଡ଼ିଶାର ସେବାୟତମାନଙ୍କ ଦ୍ୱାରା ତୀବ୍ର ପ୍ରତିକ୍ରିୟା ପ୍ରକାଶ କରିଛି।

ସୂତ୍ର ଅନୁସାରେ, ପୁରୀରେ ରଥଯାତ୍ରା ପୂର୍ବରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କ କ୍ୟାବିନେଟ ମନ୍ତ୍ରୀ ଏବଂ ବିଧାୟକମାନଙ୍କୁ ଏକ ଆଭ୍ୟନ୍ତରୀଣ ‘ଫତୱା’ ଜାରି କରିଛନ୍ତି, ଯେଉଁଥିରେ ସେମାନଙ୍କୁ ପୁରୀ ନଯିବାକୁ ନିର୍ଦ୍ଦେଶ ଦିଆଯାଇଛି। ବରଂ, ସେ ସେମାନଙ୍କୁ ପଶ୍ଚିମବଙ୍ଗର ଦୀଘା ଯାତ୍ରା କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶନାମା ଓଡ଼ିଶାରେ, ବିଶେଷକରି ଧାର୍ମିକ ଏବଂ ସାଂସ୍କୃତିକ ମହତ୍ତ୍ୱ ମଧ୍ୟରେ ବିବାଦ ସୃଷ୍ଟି କରିଛି। ସ୍ୱାଇଁ ମହାପାତ୍ର ଏହି ନିଷ୍ପତ୍ତିକୁ ନିନ୍ଦା କରିଛନ୍ତି।

ସେ କହିଛନ୍ତି ଯେ, ଏପରି ପଦକ୍ଷେପ ପୁରୀ ରଥଯାତ୍ରାର ପବିତ୍ରତା ଏବଂ ସାଂସ୍କୃତିକ ଗୁରୁତ୍ୱକୁ କ୍ଷୁର୍ଣ୍ଣ କରିପାରେ। ଏହି କଥା ମୁଖ୍ୟ ସେବକ ଜଗନ୍ନାଥ ସ୍ୱାଇଁ ମହାପାତ୍ର ଗଣମାଧ୍ୟମକୁ ପ୍ରତିକ୍ରିୟା ଦେବା ସମୟରେ କହିଛନ୍ତି।