ପୁଣି ବିଗିଡିଲା ବିନୋଦ କାମ୍ବଲିଙ୍କ ସ୍ୱାସ୍ଥ୍ୟ…
ନୂଆଦିଲ୍ଲୀ: ପୂର୍ବତନ ଟିମ୍ ଇଣ୍ଡିଆ କ୍ରିକେଟର ତଥା ସଚିନ ତେନ୍ଦୁଲକରଙ୍କ ପିଲାଦିନର ବନ୍ଧୁ ବିନୋଦ କାମ୍ବଲିଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ଏକ ଚିନ୍ତାଜନକ ଖବର ଆସିଛି। ଦୀର୍ଘ ଦିନ ଧରି ଅସୁସ୍ଥ ଥିବା କାମ୍ବଲି ଏପର୍ଯ୍ୟନ୍ତ ସମ୍ପୂର୍ଣ୍ଣ ସୁସ୍ଥ ହୋଇନାହାଁନ୍ତି। ଏନେଇ ତାଙ୍କ ଭାଇ ବୀରେନ୍ଦ୍ର କାମ୍ବଲି ସୂଚନା ଦେଇଛନ୍ତି।
ସେ କହିଛନ୍ତି ଯେ ସେ ଘରେ ଅଛନ୍ତି, ଚିକିତ୍ସା ଚାଲିଛି ଏବଂ ତାଙ୍କୁ କଥାବାର୍ତ୍ତା ଏବଂ ଚାଲିବାରେ ଅସୁବିଧା ହେଉଛି। ଭିକି ଲାଲୱାନୀଙ୍କ ଶୋ’ରେ ଏକ ଆଲୋଚନା ସମୟରେ ବୀରେନ୍ଦ୍ର କାମ୍ବଲି କହିଛନ୍ତି ଯେ ବିନୋଦଙ୍କ ଅବସ୍ଥା ବର୍ତ୍ତମାନ ସ୍ଥିର ଅଛି। ତାଙ୍କୁ କହିବାରେ ଅସୁବିଧା ହେଉଛି ଏବଂ ତାଙ୍କ ଚାଲିବା କ୍ଷମତା ମଧ୍ୟ ଦୁର୍ବଳ ହୋଇଯାଇଛି। ଫିଜିଓଥେରାପି କରାଯାଉଛି। ତଥାପି, ତାଙ୍କର ମସ୍ତିଷ୍କ ଏବଂ ପରିସ୍ରା ପରୀକ୍ଷା ସ୍ୱାଭାବିକ ହୋଇଛି।
ବୀରେନ୍ଦ୍ର ସମସ୍ତଙ୍କୁ ବିନୋଦ କାମ୍ବଲିଙ୍କ ସ୍ୱାସ୍ଥ୍ୟାବସ୍ଥା ପାଇଁ ପ୍ରାର୍ଥନା କରିବାକୁ ଅନୁରୋଧ କରିଛନ୍ତି। ସୂଚନା ଅନୁଯାୟୀ ବିନୋଦ କାମ୍ବଲି ମଧ୍ୟ ୧୦ ଦିନର ରିହାବ କରିଥିଲେ ଏବଂ ତାଙ୍କର ପୂର୍ଣ୍ଣାଙ୍ଗ ଶରୀର ଯାଞ୍ଚ କରାଯାଇଥିଲା। ରିପୋର୍ଟଗୁଡ଼ିକ ସ୍ୱାଭାବିକ ଆସିଥିଲା, କିନ୍ତୁ ଦୁର୍ବଳତା ଯୋଗୁଁ ସେ ବର୍ତ୍ତମାନ ଚାଲିପାରୁନାହାଁନ୍ତି। ସେ କଥାବାର୍ତ୍ତା କରିବା ସମୟରେ ମଧ୍ୟ ଦୁର୍ବଳ ଅନୁଭବ କରୁଛନ୍ତି। ଡାକ୍ତରମାନେ ନିରନ୍ତର ଫିଜିଓଥେରାପି ଏବଂ ବିଶ୍ରାମ ନେବା ପାଇଁ ପରାମର୍ଶ ଦେଇଥିବା ସେ କହିଛନ୍ତି।
