ସତ ଖୋଲିଦେଲା ସିଏଜି ରିପୋର୍ଟ:ଗୋଳିଆ ପାଣିରେ ଜୀବନ
ସମ୍ବଲପୁର:ସିଏଜି ଖୋଲିଛି ସତ ରିପୋର୍ଟ। ଗୋଳିଆ ପାଣିରେ ଜୀବନ ଧାରଣ ମହଙ୍ଗା ପଡିବ। ଜଳ ବିଶୋଧନାଗାର ପ୍ରକଳ୍ପ ଓ ଜଳଯୋଗାଣ ପ୍ରକଳ୍ପର ପୁନରୁଦ୍ଧାର ପାଇଁ ୯.୭୯ କୋଟି ଟଙ୍କା ଖର୍ଚ୍ଚ ପରେ ବି ଶିକ୍ଷାନଗରୀ ବୁର୍ଲାରେ ଖାଉଟିଙ୍କୁ ଦିଆଯାଉଥିଲା ଗୋଳିଆ ପାଣି। ମହାନଗର ଅଧିନସ୍ଥ ସିନ୍ଦୁରପଙ୍କ ପରେ ବୁର୍ଲାର ଜଳଯୋଗାଣ ଅବ୍ୟବସ୍ଥାକୁ ପଦାରେ ପକାଇଛି ସିଏଜି ରିପୋର୍ଟ।ଯାହା ହୋଇପାରେ ଜଣ୍ଡିସ ପରି ଅନ୍ୟ ମହାମାରୀ ରୋଗର କାରଣ।
ଏହି ରିପୋର୍ଟ ଅନୁଯାୟୀ, ୨୦୧୮ ମସିହା ଜୁଲାଇ ମାସରେ ୱାଟ୍ସ୍କୋ ଡିଭିଜନ ପକ୍ଷରୁ ବୁର୍ଲା ସହରାଞ୍ଚଳରେ ଜଳ ଯୋଗାଇଦେବା ପାଇଁ ବିତରଣ ପଦ୍ଧତି ଓ ଆନୁଷଙ୍ଗିକ କାର୍ଯ୍ୟ ସହିତ ସହରାଞ୍ଚଳକୁ ବିତରଣ ଏଲ୍ଡି ଜଳ ବର୍ତ୍ତମାନର ୪.୫ ଏମ୍ଏକ ବିଶୋଧନାଗାର ପ୍ରକଳ୍ପର ର ପୁନରୁଦ୍ଧାର କାର୍ଯ୍ୟ ହାତକୁ ନିଆ ଯାଇଥିଲା | ୨୦୨୨ ମସିହା ଜୁଲାଇ ମାସରେ ୯.୭୯ କୋଟି ଟଙ୍କା ମୂଲ୍ୟରେ ଏହା ସମ୍ପୂର୍ଣ୍ଣ ହୋଇଥିଲା। ପୁନଃନିର୍ମିତ ४.४ ଏମ୍ଏଲ୍ଜି ଜଳ ବିଶୋଧନାଗାର ପ୍ରକଳ୍ପରେ ଏକ ନୂତନ ବିଶୋଧକ (କ୍ଲାରିଫାୟ ୟର) ସ୍ଥାପନ କରା ଯାଇଥିଲା। ଏଥିରେ ସ୍ଵଚ୍ଛ ସ୍ବଳ୍ପପାଣିକୁ ଭିନ୍ନ ପଦ୍ଧତିରେ ଛଣାଯିବାର ଥିଲା। ସେପ୍ଟେମ୍ବର ୨ତାରିଖରେ ଜଳ ବିଶୋଧନାଗାର ପ୍ରକଳ୍ପର ସରଜମିନ ତଦ ତଦନ୍ତ ବେଳେ ସିଏଜି ଦେଖିବାକୁ ପାଇଥିଲା ଯେ ପୁରୁଣା ବିଶୋଧନାଗାର ଅକ୍ଷତ ରହିଥିଲା। ଏହାକୁ ଭାଙ୍ଗି ଦେବାର ନିୟମ ଥିଲେ ସୁଦ୍ଧା ଏହାକୁ ଭଙ୍ଗା ଯାଇନାହିଁ। ନୂତନ ଭାବରେ ସ୍ଥାପିତ ବିଶୋଧକରୁ ସ୍ବଚ୍ଛ ଜଳ ପୁରୁଣା ବିଶୋଧକକୁ ପ୍ରବାହିତ କରା ଯାଉଥିଲା। ପୁରୁଣା ବିଶୋଧକରେ ଅବକ୍ଷେପଣ ପ୍ରକ୍ରିୟା ସମ୍ଭବ ନଥିବାରୁ ଏଥିରେ ପ୍ରଚୁର ପରିମାଣରେ କାଦୁଅ ରହିଥିବା ଦେଖାଯାଇ ଥିଲା । ଯାହାକି ଜଳ ଉପଭୋକ୍ତା ମାନଙ୍କୁ ଯୋଗାଇ ଦିଆଯାଉଥିଲା । ପୁରୁଣା ବିଶୋଧକକୁ କାହିଁକି ଭଙ୍ଗାଯାଇନାହିଁ ତାହାର କୌଣସି ସୂଚନା ଦିଆଯାଇ ନାହିଁ। ହିତାଧିକାରୀ ସର୍ଭେରେ ସମସ୍ତ ୧୭ ଜଣ ହିତାଧିକାରୀଙ୍କୁ ଗୋଳିଆ ପାଣି ହିଁ ଯୋଗାଣ ହୋଇଥିଲା। ଡିଭିଜନାଲ ଜଳ ପରୀକ୍ଷଣ ରିପୋର୍ଟରେ ଜଳ ବିଶୋଧନାଗାର ପ୍ଲାଣ୍ଟର ସ୍ବଚ୍ଛ ଜଳସମ୍ପଦରେ ୩.୧୫ ଏନ୍ଟିୟୁ ଗୋଳିଆ ପାଣି ଥିବା ଜଣାପଡ଼ିଥିଲା। ଯାହା ୧.୦୦ ଏନ୍ଟିୟୁରୁ ଅଧିକ ଥିଲା। ଯଦି ପୁରୁଣା ବିଶୋଧକ ଭାଙ୍ଗି ଦିଆଯାଇ ଥାଆନ୍ତା ଅଥବା ନୂତନ ବିଶୋଧକର ପାଣି ପୁରୁଣା ଦେଇ ଯିବାକୁ ଦିଆଯାଇ ନଥାନ୍ତା, ତାହେଲେ ନୂତନ ବିଶୋଧକର ଲାଭ ମିଳିପାରିଥାନ୍ତା। କିନ୍ତୁ ତାହା ହୋଇନାହିଁ। ଏହା କେଉଁ ଅଦୁରାଦର୍ଶିତାର କାରଣ ତାହାକୁ ନେଇ କେବଳ ପ୍ରଶ୍ନ ଉଠିନି। ବରଂ ଏହି କ୍ଷତି ଭରଣା ପାଇଁ ସରକାର କେଉଁ ନୀତି ଆପଣେଇବେ ତାହା ଜାଣିବାକୁ ଲୋକଙ୍କ ମନରେ ଉତ୍ସୁକତା ବଢିଛି।ଜଳ ବିଶୋଧନାଗାର ପ୍ଲାଣ୍ଟର ଅନୁପଯୁକ୍ତ କାର୍ଯ୍ୟ ଯୋଗୁଁ ଖାଉଟିମାନଙ୍କୁ ଗୋଳିଆ ପାଣି ଦିଆଯାଉଥିଲା।ସମ୍ବଲପୁର ଜଳଯୋଗାଣ ଅବ୍ଯବସ୍ଥା କ୍ରମାଗତ ଭାବରେ ପଦା ରେ ପଡିବାରେ ଲାଗିଛି! ପ୍ରଥମରେ ସ୍ବାସ୍ଥ୍ୟ ବିଭାଗ ଓ ବର୍ତ୍ତମାନ ସିଏଜି ଏହାର ମୁଖା ଖୋଲିଛନ୍ତି।ତେବେବି ଏଥିପ୍ରତି କାହାରି ସୁଦ୍ଧା ଦରଦ ନାହିଁ।
