ଶ୍ରୀ ଶ୍ରୀ ଗୁପ୍ତେଶ୍ୱର ବାବା ଶୀତଳ ଷଷ୍ଠୀ ଯାତ୍ରାରେ ହେବ ଭବ୍ୟ ଶୋଭାଯାତ୍ରା

ସମ୍ବଲପୁର ପ୍ରତିନିଧି

ସମ୍ବଲପୁର:ସମ୍ବଲପୁର ଠାକୁରପଡ଼ା ସ୍ଥିତ ଶ୍ରୀ ଶ୍ରୀ ଗୁପ୍ତେଶ୍ୱର ବାବା ଶୀତଳ ଷଷ୍ଠୀ ଯାତ୍ରା କମିଟି ପକ୍ଷରୁ ଆସନ୍ତା ୧୬ ଜୁନରୁ ୨୦ ଜୁନ୍ ୨୦୨୬ ପର୍ଯ୍ୟନ୍ତ ଆଧ୍ୟାତ୍ମିକ ପରିବେଶ, ସାଂସ୍କୃତିକ ବୈଭବ ଏବଂ ଜନସାଧାରଣଙ୍କ ସହଯୋଗରେ ଭବ୍ୟ ଶୀତଳ ଷଷ୍ଠୀ ମହୋତ୍ସବ ୨୦୨୬ ଆୟୋଜନ କରାଯିବାକୁ ସମସ୍ତ ପ୍ରସ୍ତୁତି ଶେଷ ହୋଇଛି।
ଏହି ବର୍ଷର ମହୋତ୍ସବରେ ୩୦ରୁ ଅଧିକ ସାଂସ୍କୃତିକ ଏବଂ ପାରମ୍ପରିକ ଆକର୍ଷଣ ଦେଖିବାକୁ ମିଳିବ। ଏଥିରେ ଓଡ଼ିଶା ଏବଂ ପଡ଼ୋଶୀ ରାଜ୍ୟର ପ୍ରସିଦ୍ଧ ନୃତ୍ୟ ଦଳ, କାଳୀ ମାତା ଏବଂ ଅଘୋରୀ ସ୍ୱରୂପର ଜୀବନ୍ତ କଳାକୃତି (ଟାବଲୋ), ହନୁମାନ ଏବଂ ରାମ-ସୀତା ପର୍ବ, ଝାଞ୍ଜି ପାର୍ଟି, ଆଦିବାସୀ ନୃତ୍ୟ, ପାରମ୍ପରିକ ଦୁଲଦୁଲି ବାଦ୍ୟ, ବିଶାଳ ପ୍ରତିମୂର୍ତ୍ତି, ଆକର୍ଷଣୀୟ ଆଲୋକ ସଜ୍ଜା ଏବଂ ଶୋଭାଯାତ୍ରା ସମୟରେ ଏକ ଭବ୍ୟ ଅଗ୍ନି ପ୍ରଦର୍ଶନୀ (ଫାୟାର୍ ଶୋ) ସାମିଲ ରହିଛି। ଏହି କାର୍ଯ୍ୟକ୍ରମ ପାଇଁ ପ୍ରାୟ ୩୫ ରୁ ୪୦ ଲକ୍ଷ ଟଙ୍କାର ବଜେଟ୍ ଆକଳନ କରାଯାଇଛି।
ପତରପେଣ୍ଡି ଶୋଭାଯାତ୍ରା: ୧ ଜୁନ୍ ୨୦୨୬, ରାତି ୮:୦୦ ଟା,ଦେବ ନିମନ୍ତ୍ରଣ: ୧୭ ଜୁନ୍ ୨୦୨୬, ସନ୍ଧ୍ୟା ୭:୦୦ ଟା । ବରଯାତ୍ରୀ ଶୋଭାଯାତ୍ରା ୧୮ ଜୁନ୍ ୨୦୨୬, ରାତି ୮:୦୦ ଟା ,ନଗର ପରିକ୍ରମା ୧୯ ଜୁନ୍ ୨୦୨୬, ରାତି ୧୦:୦୦ ଟା ମହା ନଗର ପରିକ୍ରମା ୨୦ ଜୁନ୍ ୨୦୨୬, ସକାଳ ୧୦:୦୦ ଟା,ଭବ୍ୟ ଆଳତି ୧୮ ଜୁନ୍ ୨୦୨୬: ଠାକୁରପଡ଼ା । ୧୯ ଜୁନ୍ ୨୦୨୬ ଆଇଁଠାପାଲି ଏହି ମହୋତ୍ସବରେ ସକ୍ରିୟ ଭାବେ ଅଂଶଗ୍ରହଣ କରି ପ୍ରଭୁ ଶିବ ଏବଂ ମାତା ପାର୍ବତୀଙ୍କ ଆଶୀର୍ବାଦ ଭିକ୍ଷା କରିବା ପାଇଁ କମିଟି ପକ୍ଷରୁ ସମସ୍ତ ଶ୍ରଦ୍ଧାଳୁ, ସ୍ଥାନୀୟ ବାସିନ୍ଦା ଏବଂ ପର୍ଯ୍ୟଟକମାନଙ୍କୁ ନିବେଦନ କରାଯାଇଛି। ସମସ୍ତ ଧାର୍ମିକ ରୀତିନୀତି, ସାଂସ୍କୃତିକ କାର୍ଯ୍ୟକ୍ରମ ଏବଂ ଶୋଭାଯାତ୍ରା ଯେପରି ସୁରୁଖୁରୁରେ ସମ୍ପନ୍ନ ହେବ, ସେଥିପାଇଁ ବ୍ୟାପକ ବ୍ୟବସ୍ଥା କରାଯାଉଛି।
ଏଥିସହିତ, ପ୍ରତିବର୍ଷ ଏହି ପର୍ବକୁ ସଫଳ କରିବାରେ ସହଯୋଗ କରୁଥିବା ସମସ୍ତ ସମର୍ଥକ, ସ୍ୱେଚ୍ଛାସେବୀ ଏବଂ ଶୁଭେଚ୍ଛୁମାନଙ୍କୁ କମିଟି ଆନ୍ତରିକ କୃତଜ୍ଞତା ଜଣାଇଛନ୍ତି।