ତ୍ରିରଙ୍ଗା ଉଡ଼ାଇବା ବେଳେ ଏହି ଭୁଲ କରନ୍ତୁ ନାହିଁ, ଜାଣନ୍ତୁ ଜାତୀୟ ପତାକା ଉତ୍ତୋଳନର ଜରୁରୀ ନିୟମ…
ଅଗଷ୍ଟ ୧୫ ପ୍ରତିଟି ଭାରତୀୟଙ୍କ ପାଇଁ ଏକ ଗୌରବର ଦିନ। ୧୯୪୭ ମସିହାରେ ଏହି ଦିନ ଭାରତ ବ୍ରିଟିଶ ଶାସନରୁ ସ୍ୱାଧୀନ ହୋଇଥିଲା। ପ୍ରତିବର୍ଷ ସ୍ୱାଧୀନତା ଦିବସରେ ଲାଲକିଲ୍ଲାରେ ପ୍ରଧାନମନ୍ତ୍ରୀ ଜାତୀୟ ପତାକା ଉତ୍ତୋଳନ କରୁଥିବା ବେଳେ ସ୍କୁଲ, କଲେଜ, ସରକାରୀ କାର୍ଯ୍ୟାଳୟ ସମେତ ବିଭିନ୍ନ ସ୍ଥାନରେ ମଧ୍ୟ ତ୍ରିରଙ୍ଗା ଉଡ଼ାଯାଏ। ଘରେ ମଧ୍ୟ ଲୋକେ ଜାତୀୟ ପତାକା ଉଡ଼ାନ୍ତି। ତେବେ ତ୍ରିରଙ୍ଗା ଦେଶର ସମ୍ମାନ ଓ ଗୌରବର ପ୍ରତୀକ ହୋଇଥିବାରୁ ଏହାକୁ ଉଡ଼ାଇବା ସମୟରେ ଭାରତୀୟ ଧ୍ୱଜ ସଂହିତାର ନିୟମ ପାଳନ କରିବା ମଧ୍ୟ ଆବଶ୍ୟକ।
ଧ୍ୱଜ ସଂହିତାର ନିୟମ ଅନୁସାରେ, ତ୍ରିରଙ୍ଗାର ଆକାର ଆୟତାକାର ହେବା ସହ ଏହାର ଲମ୍ବ ଓ ପ୍ରସ୍ଥର ଅନୁପାତ ୩:୨ ରହିବା ଉଚିତ। ପତାକାର ଉପରେ କେସରିଆ, ମଝିରେ ଧଳା ଏବଂ ତଳେ ସବୁଜ ରଙ୍ଗ ରହିବା ଦରକାର। ଧଳା ପଟିର ମଝିରେ ୨୪ଟି କାଠି ଥିବା ନୀଳ ଅଶୋକଚକ୍ର ରହିବ। ତ୍ରିରଙ୍ଗାକୁ ସବୁବେଳେ ସମ୍ମାନଜନକ ଓ ସ୍ପଷ୍ଟ ସ୍ଥାନରେ ଉଡ଼ାଇବା ସହ ଏହାକୁ ପରିଷ୍କାର ଏବଂ ଅକ୍ଷତ ରଖିବା ଉଚିତ। ଜାତୀୟ ପତାକା ହାତରେ ଅଙ୍କା କିମ୍ବା ବୁଣା ହୋଇଥିବା ଏବଂ ଖାଦି ସମେତ ଅନୁମୋଦିତ କପଡ଼ାରେ ତିଆରି ହୋଇପାରେ। ସାଧାରଣ ନାଗରିକ, ବେସରକାରୀ ସଂଗଠନ ଓ ଶିକ୍ଷାନୁଷ୍ଠାନ ସମସ୍ତ ଦିନ ତ୍ରିରଙ୍ଗା ଉଡ଼ାଇପାରିବେ।
ତେବେ ତ୍ରିରଙ୍ଗାକୁ ନେଇ କିଛିଟା କଡା ନିୟମ ମଧ୍ୟ ରହିଛି । ଯେପରିକି ତ୍ରିରଙ୍ଗାକୁ କୌଣସି ପରିସ୍ଥିତିରେ ମାଟି, ଫ୍ଲୋର କିମ୍ବା ପାଣିକୁ ଛୁଇଁବା ଉଚିତ ନୁହେଁ। ଏହାକୁ ଓଲଟା ଉଡ଼ାଇବା, ଫାଟିଥିବା କିମ୍ବା ମଇଳା ପତାକା ବ୍ୟବହାର କରିବା ମଧ୍ୟ ନିୟମ ବିରୋଧୀ ଅଟେ। ଜାତୀୟ ପତାକାକୁ ସାଜସଜ୍ଜା, ପୋଷାକ କିମ୍ବା ଅନ୍ୟ କୌଣସି ବସ୍ତୁ ଢାଙ୍କିବା ପାଇଁ ବ୍ୟବହାର କରାଯାଇପାରିବ ନାହିଁ। ତ୍ରିରଙ୍ଗା ଉପରେ କିଛି ଲେଖିବା, ଛାପିବା କିମ୍ବା କୌଣସି ଚିହ୍ନ ଦେବା ମଧ୍ୟ ନିଷିଧ। ପତାକାକୁ ଅନ୍ୟ ଝଣ୍ଡାଠାରୁ ନିମ୍ନ ସ୍ଥାନରେ ଉଡ଼ାଇବା ମଧ୍ୟ ଉଚିତ ନୁହେଁ। ପତାକା ଓହ୍ଲାଇବା ସମୟରେ ଏହାକୁ ସମ୍ମାନର ସହ ଧୀରେ ଧୀରେ ତଳକୁ ଆଣି ସଠିକ୍ ଭାବେ ମୋଡ଼ି ରଖିବା ଆବଶ୍ୟକ। ତ୍ରିରଙ୍ଗାକୁ ଇଚ୍ଛାକୃତ ଭାବେ ନଷ୍ଟ, ଚିରିବା କିମ୍ବା ଜାଳିବା ଆଇନ ଅନୁସାରେ ଦଣ୍ଡନୀୟ ଅପରାଧ। ତେଣୁ ତ୍ରିରଙ୍ଗା ଉଡ଼ାଇବା ପୂର୍ବରୁ ଏ ସବୁ ନିୟମ ଉପରେ ଧ୍ୟାନ ଦେବା ଆବଶ୍ୟକ।
