Hyderabad Murder Case:ଘରୋଇ କଳହରୁ ସ୍ୱାମୀଙ୍କ ମୃତ୍ୟୁ ଅଭିଯୋଗ, ଛାତିରେ ଛୁରି ମାରିଥିବା ଅଭିଯୋଗରେ ପତ୍ନୀ ଗିରଫ
ହାଇଦ୍ରାବାଦ: ହାଇଦ୍ରାବାଦର କୋଥାପେଟ୍ ଅଞ୍ଚଳରେ ଘରୋଇ କଳହକୁ ନେଇ ଜଣେ ମହିଳା ନିଜ ସ୍ୱାମୀଙ୍କୁ ଛୁରି ମାରି ହତ୍ୟା କରିଥିବା ଅଭିଯୋଗ ହୋଇଛି। ମୃତକ ୫୫ ବର୍ଷୀୟ କୋଟମ ପ୍ରଭାକର ଜଣେ ସୁରକ୍ଷା କର୍ମୀ ଥିଲେ। ସେ ନିଜ ୪୫ ବର୍ଷୀୟ ପତ୍ନୀ ରଜିଥା ଓ ଦୁଇ ଝିଅଙ୍କ ସହ ଏକ ଭଡ଼ା ଘରେ ରହୁଥିଲେ। ଅକ୍ଟୋବର ୩୧ ତାରିଖ ସକାଳ ପ୍ରାୟ ୯ଟା ୨୦ ମିନିଟ୍ରେ ପରିବାରିକ କଥାକୁ ନେଇ ଦମ୍ପତିଙ୍କ ମଧ୍ୟରେ ଯୁକ୍ତିତର୍କ ହୋଇଥିବା ପୋଲିସ କହିଛି।
ଅଭିଯୋଗ ଅନୁସାରେ, ଯୁକ୍ତିତର୍କ ବଢ଼ିବା ପରେ ରଜିଥା ରୋଷେଇ ଘରେ ଥିବା ଛୁରିରେ ପ୍ରଭାକରଙ୍କ ଛାତିରେ ଆଘାତ କରିଥିଲେ। ଗୁରୁତର ଆହତ ପ୍ରଭାକରଙ୍କ ଅବସ୍ଥା ଦେଖି ତାଙ୍କ ଝିଅମାନେ ଆମ୍ବୁଲାନ୍ସ ଡାକିଥିଲେ। ପରେ ତାଙ୍କୁ କୋଥାପେଟ୍ର ଓମ୍ନି ହସ୍ପିଟାଲକୁ ନିଆଯାଇଥିଲା। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ଅଧିକାରୀଙ୍କ ଅନୁସାରେ, ଘଟଣାସ୍ଥଳରେ ଅଧିକ ରକ୍ତସ୍ରାବ ହେବାରୁ ପ୍ରଭାକର ଅଚେତ ହୋଇପଡ଼ିଥିଲେ।
ମୃତକଙ୍କ ସାନ ଭାଇ କୋଟମ ବିଜୟଭାସ୍କରଙ୍କ ଅଭିଯୋଗ ଆଧାରରେ ଚୈତନ୍ୟପୁରୀ ପୋଲିସ ଭାରତୀୟ ନ୍ୟାୟ ସଂହିତା (BNS)ର ଧାରା ୧୦୩(୧) ଅନୁସାରେ ହତ୍ୟା ମାମଲା ରୁଜୁ କରିଛି। ଏହି ମାମଲାରେ ରଜିଥାଙ୍କୁ ଗିରଫ କରାଯାଇଛି। ମଲ୍କାଜଗିରି ଏସିପି ରବିନ୍ଦର ରେଡ୍ଡୀଙ୍କ କହିବା ଅନୁସାରେ, ପୋଲିସ ଘଟଣାର ପରିସ୍ଥିତି ଯାଞ୍ଚ କରିବା ସହ ଆବଶ୍ୟକ ପ୍ରମାଣ ସଂଗ୍ରହ କରୁଛି।
