ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ16/07/2023 at 10:59 AM
କଟକ: ପୁଣି ଜୀବନ ନେଲା ମୁକୁଳା ଡ୍ରେନ। ଶନିବାର କଟକ ନିମସାହିରେ ଥିବା ଏକ ଡ୍ରେନରେ ଭିତରେ ପଡି ଜଣେ ଯୁବକଙ୍କ ମୃତ୍ୟୁ ହୋଇଛି । ମୃତ ଯୁବକ ହେଲେ କଟକ ଝୋଲାସାହି ଅଞ୍ଚଳରେ ଭଡ଼ାରେ ରହୁଥିବା ରାହୁଲ । ତାଙ୍କ ଘର ରାଜସ୍ଥାନରେ ବୋଲି ଜଣାପଡିଛି । ସେ ଏଠି କିଛି ବର୍ଷ ହେବ ଭଡ଼ାରେ ରହି ଷ୍ଟୋଭ୍ ମରାମତି କରି ଚଳୁଥିଲେ ।
ସୂଚନା ଅନୁଯାୟୀ, ଲଗାଣ ବର୍ଷା ଯୋଗୁଁ କଟକରେ ଅନେକ ଡ୍ରେନ୍ରେ ପାଣିର ସ୍ରୋତ ବଢିବାରେ ଲାଗିଛି । ଶନିବାର କାମ ସାରି ଭଡ଼ା ଘରକୁ ଫେରୁଥିବା ବେଳେ ଦୁର୍ଭାଗ୍ୟବଶତଃ ବିମ୍ବଳେଇ ମନ୍ଦିର ପାର୍ଶ୍ଵ ଦେଇ ଯାଇଥିବା ଏକ ବଡ଼ ଡ୍ରେନ୍ରେ ପଡ଼ି ଯାଇଥିଲେ । ଏହି ଘଟଣା କେହି ଦେଖି ପାରିନଥିଲେ । ପ୍ରାୟ ଅଧ ଘଣ୍ଟା ପରେ ବର୍ଷା ଥମିବା ପରେ ତାଙ୍କ ହାତ ଡ୍ରେନ୍ ଉପରକୁ ଦିଶିଥିଲା ।
ସ୍ଥାନୀୟ ଲୋକେ ତାଙ୍କୁ ନିକଟସ୍ଥ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ । ପରେ ତାଙ୍କୁ ଏସ୍ସିବି ସ୍ଥାନାନ୍ତର କରାଯାଇଥିଲା । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବାତ ମାରିବାରୁ ସେ ଡ୍ରେନ୍ରେ ପଡିଯାଇଥିବା ଏବଂ ପରେ ବୁଡ଼ିଯାଇ ତାଙ୍କର ମୃତ୍ୟୁ ହୋଇଥିବା ଅନୁମାନ କରାଯାଉଛି । ଏନେଇ ଥାନାରେ କୌଣସି ଅଭିଯୋଗ ହୋଇନଥିବା ଜଣାପଡିଛି ।