ଅର୍ଥ ଲଗାଣକାରୀ ସଂସ୍ଥା ଜନସନ ଏଣ୍ଡ ଜନସନ ଫେରାର।


କୋକସରା:୨୦/୦୭ କମ ଅର୍ଥ ବିନିଯୋଗ କରି ପ୍ରଚୁର ଲାଭ ପାଇବା ଆଶା ମଉଳିଲା,ମାତ୍ର ଦୁଇ ମାସରେ ମୂଳଧନର ୨୦୦-୨୫୦ ପ୍ରତିଶତ ଫେରସ୍ତ ଦେବା ଲୋଭ ଦେଖାଇ ଲୋକଙ୍କୁ ଚୁନା ଲଗାଇ ଫେରାର ମାରିଛି ଜନସନ ଏଣ୍ଡ ଜନସନ ନାମକ ଏକ ସଂସ୍ଥା। ଗତ ତିନି ମାସ ହେବ ଧର୍ମଗଡ଼ ସହର କଲେଜ ରାସ୍ତାରେ ଭଡ଼ା ଘରେ ଏହି କମ୍ପାନୀ ଅଫିସ ଖୋଲିଥିଲା। ଧର୍ମଗଡ଼ ସହରର ଜଣେ ବ୍ୟକ୍ତି ଆଞ୍ଚଳିକ ମୁଖ୍ୟ ଥିଲେ ଏବଂ ଏହି କମ୍ପାନୀରେ ପ୍ରାୟ ୨୦ଜଣ ଯୁବକ କାମ କରୁଥିଲେ। ଯୋଉମାନେ ଗାଁ ଗାଁ ବୁଲି ଲୋକଙ୍କୁ ଅର୍ଥ ବିନିଯୋଗ କରି ପ୍ରଚୁର ଲାଭ ପାଇବା ଆଶା ଦେଖାଉଥିଲେ। କମ୍ପାନୀର ପଲିସି ଅନୁଯାୟୀ, କମ୍ପାନୀ କୁଆଡେ ଲୋକଙ୍କ ଠାରୁ ଟଙ୍କା ନେଇ ବଦଳରେ ସେମାନଙ୍କୁ ଡ଼ାକ୍ତରୀ ସରଞ୍ଜାମ ଦେଉଥିଲା ଏବଂ ପ୍ରତିଦିନ ଲଗାଣ ଅର୍ଥର ୪/୨୫ ପ୍ରତିଶତ ଟଙ୍କା ଜମା ଦେଉଥିଲା। ଜଣେ ୫୧୦ଟଙ୍କା ବିନିଯୋଗ କଲେ ତାକୁ ତତକ୍ଷଣାତ୍ ୧୧୦ଟଙ୍କା ଜମା ଦେବା ସହ ପ୍ରତିଦିନ ୨୩ଟଙ୍କା ହିସାବରେ ୫୪-୬୦ଦିନରେ ୧୧୫୦-୧୨୦୦ଟଙ୍କା ଫେରସ୍ତ ଦେଉଥିଲା। ୫୧୦୦ଟଙ୍କାରେ ପ୍ରତିଦିନ ୪୦୦ଟଙ୍କା ହିସାବରେ ୬୦ଦିନରେ ୨୪୦୦୦ଟଙ୍କା ଫେରି ପାଇବା ଗ୍ୟାରେଣ୍ଟି ଦେଉଥିଲା। ଗତ ଦୁଇ ଦିନ ହେବ କମ୍ପାନୀ ପକ୍ଷରୁ ଆହୁରି ଅନେକ ଆକର୍ଷଣୀୟ ଅଫର ଘୋଷଣା କରାଯାଇଥିଲା। ଏପରିକି ୩୦୦୦ଟଙ୍କା ବିନିଯୋଗରେ ପ୍ରତିଦିନ ୩୦୦୦ ଟଙ୍କା ୧୫ ଦିନ ପାଇଁ ୪୫ ହଜାର ଟଙ୍କା ଫେରସ୍ତ ଗ୍ୟାରେଣ୍ଟି ଦେଇଥଲା। କରୋନା କାଳରେ ବଡ଼ବଡ଼ କମ୍ପାନୀର ଆର୍ଥିକ ମେରୁଦଣ୍ଡ ଦୋହଲି ଯାଇଥିବାବେଳେ କର୍ମଚାରୀ ଛଟେଇ ଜାରି ରହିଛି। ଏପରିସ୍ଥଳେ ଏକ ଅର୍ଥ ଲଗାଣକାରୀର ଏଭଳି ଅଫର ଲୋକଙ୍କୁ ବିସ୍ମିତ କରିବା ସହ କମ୍ପାନୀର ବିଶ୍ୱସନୀୟତା ପ୍ରତି ଲୋକଙ୍କ ମଧ୍ୟରେ ସନ୍ଦେହ ସୃଷ୍ଟି କରିଥିଲା । ଏସମ୍ପର୍କରେ ଧର୍ମଗଡ଼ ସ୍ଥିତ କମ୍ପାନୀ ଶାଖା କାର୍ଯ୍ୟାଳୟରେ ବୁଝିବାକୁ ଯିବାବେଳେ କାର୍ଯ୍ୟାଳୟରେ ତାଲା ଝୁଲିବା ସହ କର୍ମଚାରୀ ଫେରାର ମାରିଥିବା ଜଣାପଡିଥିଲା। ଘଟଣା ଜଣାପଡ଼ିବା ପରେ ନିବେଶକମାନେ କାର୍ଯ୍ୟାଳୟ ସମ୍ମୁଖରେ ଭିଡ଼ ଜମାଇଥିଲେ।

ଗଜପତି ଜିଲ୍ଲାରେ ଆନ୍ଧ୍ର ଅଧିକାରୀମାନଙ୍କ ବେଆଇନ ପ୍ରବେଶକୁ ପ୍ରଶୟ ଦିଆଯିବ ନାହିଁ…. ଗଜପତି ଜିଲ୍ଲାପାଳ ପାରଳାଖେମୁଣ୍ଡି,୧୯/୭(ଗରୁଡ ଧ୍ୱଜ ଚୌଧୁରୀ) ଓଡ଼ିଶା ସୀମାରେ ଆନ୍ଧ୍ର ଅଧିକାରୀଙ୍କ ଅନୁପ୍ରବେଶ କରି ଓଡ଼ିଶାର 3 ଗୋଟି ଗାଁକୁ ଆନ୍ଧ୍ରର ବୋଲି ଦାବି କରିବା ବ୍ୟର୍ଥ ଉଦ୍ୟମକୁ କେବେ ବି ସଫଳ କରି ଦିଆଯିବନାହିଁ. ଓଡିଶା ତଥା ଗଜପତି ଜିଲ୍ଲାର ପରିସୀମା ମଧରେ ଆନ୍ଧ୍ର ଅଧିକାରୀଙ୍କ ବେଆଇନ ପ୍ରବେଶ ଓ ବିଭିନ୍ନ ମିଥ୍ୟା ଓ ବିଭ୍ରାନ୍ତିକର ମନ୍ତବ୍ୟକୁ କେବେ ବି ପ୍ରଶୟ ଦିଆ ଯିବନାହିଁ ବୋଲି ଗଜପତି ଜିଲ୍ଲାପାଳ ବିଜୟ କୁମାର ଦାସ ଦୃଢତାର ସହ ପ୍ରକାଶ କରିଛନ୍ତି.ଏହି ଘଟଣା ନେଇ ଗଜପତି ଜିଲ୍ଲା ପ୍ରଶାସନ ସମ୍ପୂର୍ଣ ଆକସନ୍ ମୁଡ୍‌ରେ ରହିଥ‌ିବା ଜଣାପଡ଼ିଛି। ଗଜପତି ଜିଲ୍ଲା ରାୟଗଡ଼ ବ୍ଲକ ଅଧୀନ ଗଙ୍ଗାବାଡ଼ ପଞ୍ଚାୟତର ମାଣିକପାଟଣା, ଆମରିଙ୍ଗି ଓ ବୁରୁସିଂ ଆଦି 3 ଗୋଟି ଗ୍ରାମକୁ ଗଜପତି ଜିଲ୍ଲାପାଳ ବିଜୟ କୁମାର ଦାସ ଓ ଆରକ୍ଷୀ ଅଧୀକ୍ଷକ ଯତୀନ୍ଦ୍ର ପଣ୍ଡା ପହଞ୍ଚି ଲୋକଙ୍କ ସହ ସାକ୍ଷାତ କରି ବିଭିନ୍ନ ବିଷୟରେ ଆଲୋଚନା କରିଛନ୍ତି। ଆନ୍ଧ୍ରର କୌଣସି ଅଧିକାରୀ ଆସିଲେ ଡରିବାର ନାହିଁ. ତୁରନ୍ତ ପ୍ରଶାସନକୁ ଜଣାଇବାକୁ ଜିଲ୍ଲାପାଳ ଗ୍ରାମବାସୀଙ୍କୁ କହିଛନ୍ତି. ଓଡ଼ିଶା ଜାଗା ଛାଡିବୁନି କି ଆନ୍ଧ୍ର ଜାଗା ମାଡ଼ିବୁ ନାହିଁ ବୋଲି ଜିଲ୍ଲାପାଳ ବିଜୟ କୁମାର ଦାସ ଗ୍ରାମବାସୀମାନଙ୍କୁ ଦୃଢତାର ସହ ପ୍ରକାଶ କରିଛନ୍ତି। ଏଥିସହ ମାଣିକପାଟଣାରେ ତିଆରି ହୋଇଥିବା ଆନ୍ଧ୍ରର ଅଙ୍ଗନବାଡ଼ି କେନ୍ଦ୍ରକୁ ବୁଲି ଦେଖୁବା ସହ ଉକ୍ତ କେନ୍ଦ୍ରର ସୀମା ଚିହ୍ନଟ ପାଇଁ ରାୟଗଡ ତହସିଲଦାରଙ୍କୁ ନିର୍ଦ୍ଦେଶ ଦେଇଛନ୍ତି। ସୀମାକୁ ନେଇ କୌଣସି ବିବାଦ ନାହିଁ ଉନ୍ନୟନ କାର୍ଯ୍ୟ ହୋଇଥିବା ଅଞ୍ଚଳ ଓଡ଼ିଶାର, ଓଡ଼ିଶା ସୀମା ଭିତରେ ହିଁ ରହିଛି. ଗତ କିଛି ଦିନ ତଳେ ପାରଳାଖେମୁଣ୍ଡି ଉପଜିଲ୍ଲାପାଳ ଏହି ଅଞ୍ଚଳ ଗସ୍ତ କରି ସମସ୍ତ ଅନୁଧ୍ୟାନ କରିବା ପରେ ଯେଉଁ ରିପୋର୍ଟ ପ୍ରଦାନ କରିଛନ୍ତି ଆନ୍ଧ୍ରର ଶ୍ରୀକାକୁଲମ ଜିଲ୍ଲାପାଳଙ୍କୁ ଚିଠି ଲେଖୁ ଜଣାଇ ଦିଆଯାଇଛି। ଏହି ଗସ୍ତ ସମୟରେ ସହକାରୀ ନିର୍ବାହୀ ଯନ୍ତ୍ରୀ ସିଦ୍ଧାର୍ଥ ଶଙ୍କର ତ୍ରିପାଠୀ, ସିଡିପିଓ ବି. କାମଳାଙ୍ଗୀ, ଏସ୍‌ ଡିପିଓ ମାଧବାନନ୍ଦ ନାୟକ, ଜିଲ୍ଲା ଶିକ୍ଷା ଅଧିକାରୀ ମାୟାଧର ସାହୁ, ଗାରାବନ୍ଧ ଥାନା ଅଧିକାରୀ ପ୍ରଶାନ୍ତ ନିଶିକା ପ୍ରମୁଖଙ୍କ ସହ କେତେଜଣ ପ୍ରଶାସନିକ ଅଧିକାରୀ ଏହି 3 ଗୋଟି ଗ୍ରାମକୁ ଉପଜିଲ୍ଲାପାଳଙ୍କ ସହ ଗସ୍ତ କରି ସମସ୍ତ ଅନୁଧ୍ୟାନ କରିଥିଲେ। ମୋଟାମୋଟି ଭାବେ ଏହି ସମସ୍ତ ଅଞ୍ଚଳ କେବଳ ଓଡିଶାର ଏବଂ ଗଜପତି ଜିଲ୍ଲା ଅଧୀନରେ ରହିଥିବା ସ୍ପଷ୍ଟ ହୋଇଯାଇଛି. ଆଗାମୀ ଦିନରେ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଉନ୍ନୟନମୂଳକ ଯୋଜନାରେ ଆହୁରି ଅନେକ ବିକାଶମୂଳକ ଜନ ହିତକର କାର୍ଯ୍ୟ କରାଯିବ. ତେଣୁ ଅଞ୍ଚଳବାସୀ ଆନ୍ଧ୍ରର କେତେକ ଅଧିକାରୀଙ୍କ ବିଭ୍ରାନ୍ତିମୂଳକ ଓ ଭୁଲ ତଥ୍ୟକୁ କୌଣସି ଭାବେ ଗୁରୁତ୍ୱ ନ ଦେଇ ଓଡିଶା ପ୍ରଶାସନର ବିଭିନ୍ନ ଉନ୍ନୟନମୂଳକ ଯୋଜନାରେ ନିଜ ନିଜକୁ ସାମିଲ କରି ଏହି ଅଞ୍ଚଳର ଉନ୍ନତି ଓ ବିକାଶ ପାଇଁ ସହଯୋଗ କରନ୍ତୁ ବୋଲି ଗଜପତି ଜିଲ୍ଲାପାଳ ବିଜୟ କୁମାର ଦାଶ ସମ୍ପୃକ୍ତ ଅଞ୍ଚଳବାସୀଙ୍କୁ ନିବେଦନ କରିଛନ୍ତି.