ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

1/09/2023 at 2:22 PM

ନୂଆଦିଲ୍ଲୀ: ଚନ୍ଦ୍ରର ଦକ୍ଷିଣ ମେରୁରେ ଚନ୍ଦ୍ରଯାନ-୩ର ସଫଳ ଅବତରଣ ପରେ ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋ) ଦେଶର ପ୍ରଥମ ସୌର ମିଶନ ଆଦିତ୍ୟ-ଏଲ୧ ପାଇଁ ସଂପୂର୍ଣ୍ଣ ପ୍ରସ୍ତୁତ। ସୂର୍ଯ୍ୟ ମିଶନର ଉତକ୍ଷେପଣ ଶନିବାର ଦିନ ୧୧ଟା ୫୦ ମିନିଟରେ ଶ୍ରୀହରିକୋଟା ସ୍ଥିତ ସତୀଶ ଧାଓ୍ଵନ ମହାକାଶ କେନ୍ଦ୍ରରୁ କରାଯିବ। ଏଥିପାଇଁ ଓଲଟା ଗଣତି ଆରମ୍ଭ ହୋଇ ଯାଇଛି।

ଲଞ୍ଚିଂ ପୂର୍ବରୁ ରିହରସଲ ଓ ସ୍ପେସକ୍ରାଫ୍ଟର ଆଭ୍ୟନ୍ତରୀଣ ଯାଞ୍ଚ ପୂରା ହୋଇ ସାରିଛି। ଆଦିତ୍ୟ-ଏଲ୧କୁ ପିଏସଏଲଭି-ସି୫୭ ଦ୍ଵାରା ପ୍ରକ୍ଷେପଣ କରାଯିବ। ଏହା ସୂର୍ଯ୍ୟର ବିସ୍ତୃତ ଅଧ୍ୟୟନ ପାଇଁ ୭ ପେଲୋଡ ନେଇ ମହାକାଶକୁ ଯିବ। ଏଥିରୁ ୪ ପେଲୋଡ ସୂର୍ଯ୍ୟକିରଣର ନିରୀକ୍ଷଣ କରିବ ଏବଂ ଅନ୍ୟ ୩ ପେଲୋଡ ଚୁମ୍ବକୀୟ କ୍ଷେତ୍ରର ଇନ-ସିଟୁ ମାପଦଣ୍ଡର ଅଧ୍ୟୟନ କରିବ।

ଆଦିତ୍ୟ-ଏଲ୧ରେ ସବୁଠୁ ବଡ଼ ତଥା ବୈଷେୟିକ ଭାବେ ସବୁଠୁ ଆହ୍ଵାନପୂର୍ଣ୍ଣ ପେଲୋଡ ଭିଜିବଲ ଏମିଶନ ଲାଇନ କରୋନାଗ୍ରାଫ ଅର୍ଥାତ ଭିଇଏଲସି ଲଗାଯାଇଛି। ଭିଇଏଲସିକୁ ଭାରତୀୟ ଜ୍ୟୋତିର୍ବିଜ୍ଞାନ ସଂସ୍ଥା ପ୍ରସ୍ତୁତ କରିଛି। ଆଦିତ୍ୟ-ଏଲ୧କୁ ଲାଗ୍ରାଞ୍ଜିଆନ ପଏଣ୍ଟ-୧ ଚାରିପଟେ ପ୍ରଭମଣ୍ଡଳ କକ୍ଷପଥରେ ସ୍ଥାପିତ କରାଯିବ, ଯାହା ପୃଥିବୀ ଠାରୁ ୧୫ ଲକ୍ଷ କିଲୋମିଟର ଦୂରରେ ଅବସ୍ଥିତ। ଏହି ଦୂରତା ଅତିକ୍ରମ କରିବା ପାଇଁ ଆଦିତ୍ୟ-ଏଲ୧କୁ ୪ ମାସର ସମୟ ଲାଗିବ।

ଏଲ-୧ ପଏଣ୍ଟରେ ସ୍ଥାପିତ ଏକ ଉପଗ୍ରହର ସବୁଠୁ ବଡ଼ ସୁବିଧା ହେଉଛି ଏହା କୌଣସି ପ୍ରକାରର ମହାଜାଗତିକ ଘଟଣା ବା ଗ୍ରହଣଜନିତ ବାଧା ବ୍ୟତିରକେ ସୂର୍ଯ୍ୟକୁ ନିରବଚ୍ଛିନ୍ନ ଭାବେ ନିରୀକ୍ଷଣ କରି ପାରିବ। ସୂର୍ଯ୍ୟର ଫଟୋସ୍ଫିୟର, କ୍ରୋମୋସ୍ଫିୟର ଓ ବାହ୍ୟସ୍ତର କରୋନା ଉପରେ ପର୍ଯ୍ୟବେକ୍ଷଣ କରିବା ପାଇଁ ଏଥିରେ ୭ଟି ପେଲୋଡ ରହିଛି। ମହାକାଶ ପାଣିପାଗ ଓ ପୃଥିବୀ ଉପରେ ଏହାର ପ୍ରଭାବ ଆଦି ଉପରେ ଏଗୁଡ଼ିକ ତଥ୍ୟ ସଂଗ୍ରହ କରିବ।