୨୬ରେ ଆସୁଛି ଆଉ ଏକ ଲଘୁଚାପ, ନେଇପାରେ ବାତ୍ୟାର ରୂପ
ଭୁବନେଶ୍ଵର: ପୁଣି ଆସୁଛି ଆଉ ଏକ ଲଘୁଚାପ। ନଭେମ୍ବର ୨୬ ତାରିଖ ସୁଦ୍ଧା ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି। ଲଘୁଚାପ ସୃଷ୍ଟି ପରେ ପଶ୍ଚିମ-ଉତ୍ତର ପଶ୍ଚିମ ଦିଗକୁ ଗତି କରିବ। ୨୭ ତାରିଖ ବେଳକୁ ଲଘୁଚାପ ଅବପାତରେ ପରିଣତ ହେବାର ସମ୍ଭାବନା ରହିଛି। ପରିବର୍ତ୍ତୀ କାଳରେ ଦକ୍ଷିଣପୂର୍ବ ବଙ୍ଗୋପସାଗର ଓ ଆଣ୍ଡାମାନ ସାଗର ଅଞ୍ଚଳରେ ଅବପାତର ରୂପ ନେବ। ଲଘୁଚାପ ଓ ଅବପାତ ସମ୍ଭାବନା ନେଇ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ତେବେ ଅବପାତ ପରବର୍ତ୍ତୀ ଅବସ୍ଥାରେ କି ରୂପ ନେବ ସ୍ପଷ୍ଟ ହୋଇନି।
୨୯ ତାରିଖବେଳକୁ ସମୁଦ୍ର ଭିତରେ ଏହା ବାତ୍ୟା ରୂପ ନେଇପାରେ । ଡିସେମ୍ବର ୨ କିମ୍ବା ୩ ତାରିଖ ବେଳକୁ ଏହା ଆନ୍ଧ୍ର ଉପକୂଳ ଛୁଇଁପାରେ ବୋଲି ଜିଏଫଏସ୍ ମଡେଲ୍ ବର୍ତ୍ତମାନ ପୂର୍ବାନୁମାନ କରିଛି । ହେଲେ ଏହା କେବଳ ପ୍ରାକ୍ ଆକଳନ । ସମ୍ଭାବ୍ୟ ଗତିପଥ ଓ ପ୍ରଭାବ ନେଇ ନିର୍ଦ୍ଦିଷ୍ଟ ଭାବେ ଆଗୁଆ ପୂର୍ବାନୁମାନ କରିବା ସହଜ ନୁହେଁ ବୋଲି ପାଣିପାଗ ବିଶେଷଜ୍ଞ କହିଛନ୍ତି ।
ସୂଚନାଯୋଗ୍ୟ, ନିକଟରେ ବଙ୍ଗୋପସାଗରରେ ସୃଷ୍ଟି ଲଘୁଚାପ ଅବପାତରେ ରୂପ ନେଇ ଛୋଟ ବାତ୍ୟାରେ ପରିଣତ ହୋଇଥିଲା। ହେଲେ ଏହା ସମୟକ୍ରମେ ଦୁର୍ବଳ ହୋଇ ବାଂଲାଦେଶ ଆଡ଼କୁ ମୁହାଁଇଥିଲା। ଏହାରି ପ୍ରଭାବରେ ଉତ୍ତର ଓଡ଼ିଶାର କିଛି ଜିଲ୍ଲାରେ ହାଲୁକା ବର୍ଷା ହୋଇଥିଲା।
