ଓଡ଼ିଶା ଡଟ୍ ନ୍ୟୁଜ୍27/05/2024 at 1:13 PM
କେନ୍ଦ୍ରାପଡ଼ା: ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆଜି କେନ୍ଦ୍ରାପଡ଼ାରେ ଦଳୀୟ ସାଂସଦ ଓ ବିଧାୟକ ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି । ବିଜେଡି ସରକାର ଜନ ହିତକର ଯୋଜନାର ଗୋଟି ଗୋଟି ନାଁ ନେଇ ଏହା ଭଲ କି ନୁହେଁ ଉପସ୍ଥିତ ଜନତାଙ୍କୁ ପଚାରିଥିଲେ ମୁଖ୍ୟମନ୍ତ୍ରୀ । ଜୁଲାଇ ପହିଲାରୁ ଆଉ ବିଜୁଳି ବିଲ୍ ଆସିବନି କହିଥିଲେ । ଏହାସହ ବିଜେପି ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡାଙ୍କ ନାଁ ନନେଇ ତାଙ୍କୁ କଟୁ ସମାଲୋଚନା କରିଥିଲେ ।
ସଭା ମଞ୍ଚରୁ ଜନତାଙ୍କୁ ସମ୍ବୋଧିତ କରିବା ବେଳେ ନବୀନ କହିଥିଲେ, ବିରୋଧୀ ଦଳ ମିଛ ଅପପ୍ରଚାର କରୁଛନ୍ତି, କୁମ୍ଭୀର କାନ୍ଦଣା କାନ୍ଦୁଛନ୍ତି । କେନ୍ଦ୍ରାପଡାରୁ ଜଣଙ୍କୁ ୧୦ ବର୍ଷ ସାଂସଦ କରି ପଠାଇଥିଲୁ । ସେ କେନ୍ଦ୍ରାପଡା ପାଇଁ କାମ କରିବା ପରିବର୍ତ୍ତେ ନିଜ କମ୍ପାନୀ ପାଇଁ କାମ କଲେ । କେନ୍ଦ୍ରାପଡା ଓ ମୋ ସହ ବିଶ୍ୱାସଘାତକତା କଲେ । ତେବେ ନାଁ ନନେଇ ବୈଜୟନ୍ତଙ୍କ ଉପରେ ଏମିତି ବର୍ଷିଥିଲେ ନବୀନ । ଏହାସହ ଶଙ୍ଖ ଚିହ୍ନକୁ ଆଶୀର୍ବାଦ କରିବାକୁ କେନ୍ଦ୍ରାପଡାବାସୀଙ୍କୁ ଅପିଲ କରିଥିଲେ ।