ଓଡ଼ିଶା ଡଟ୍ ନ୍ୟୁଜ୍26/06/2024 at 8:00 AM
ସମ୍ବଲପୁର: ଟ୍ରାକ୍ଟରକୁ ପଛ ପଟୁ ଧକ୍କା ଦେଲା ଅଟୋ । ଫଳରେ ଅଟୋରେ ଥିବା ଜଣେ ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ୭ ଜଣ ଗୁରୁତର ଆହତ ହୋଇଛନ୍ତି । ଆହତମାନଙ୍କୁ ମେଡିକାଲରେ ଭର୍ତ୍ତି କରାଯାଇଛି । ସମ୍ବଲପୁର ଜିଲ୍ଲା ସଦର ଥାନା ବାଗଡେରା ଶିବ ମନ୍ଦିର ନିକଟରେ ଏହି ଦୁର୍ଘଟଣା ଘଟିଛି । ମୃତାହତଙ୍କ ଘର ଘେନୁପାଲିରେ ବୋଲି ଜଣାଯାଇଛି।
ଗତକାଲି ରାତିରେ ଏକ ଅଟୋରେ କିଛି ଲୋକଙ୍କୁ ଧରି ସମ୍ବଲପୁରରୁ ଘେନୁପାଲି ଫେରୁଥିଲେ । ଏହି ସମୟରେ ବାଗଡେରା ଶିବ ମନ୍ଦିର ନିକଟରେ ଅଟୋଟି ପଛରୁ ଆସି ଟ୍ରାକ୍ଟରକୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ଜଣଙ୍କର ମୃତ୍ୟୁ ଘଟିଥିବା ବେଳେ ୭ ଜଣ ଗୁରୁତର ଆହତ ହୋଇଥିଲେ । ଆହତମାନଙ୍କୁ ପ୍ରଥମେ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ସମସ୍ତଙ୍କୁ ବୁର୍ଲା ସ୍ଥାନାନ୍ତର କରାଯାଇଛି ।
ଦୁର୍ଘଟଣା ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଗାଡି ଦୁଇଟିକୁ ଜବତ କରିଛି । ଏହାସହ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।