ଓଡ଼ିଶା ଡଟ୍ ନ୍ୟୁଜ୍

1/10/2024 at 5:41 PM

ପୁରୀ: ଜେଜେମାଆଙ୍କ ଶ୍ରାଦ୍ଧ ଦେବାକୁ ପୁରୀ ଆସି ପ୍ରାଣ ହରାଇଲେ ଦୁଇ ଭାଇ । ନରେନ୍ଦ୍ର ପୁଷ୍କରଣୀରେ ଶ୍ରାଦ୍ଧ ଦେବା ବେଳେ ବୁଡ଼ି ଯାଇ ଦୁଇ ସମ୍ପର୍କୀୟ ଭାଇଙ୍କ ମୃତ୍ୟୁ ଘଟିଛି । ମୃତକ ହେଲେ ଆନ୍ଧ୍ରପ୍ରଦେଶ ଇଚ୍ଛାପୁରମର ନଳୀନିକାନ୍ତ ତ୍ରିପାଠୀ ଏବଂ ଗଞ୍ଜାମ କୁକୁଡ଼ାଖଣ୍ଡିର ରାଜକିରଣ ଶତପଥୀ ।
ନରେନ୍ଦ୍ର ପୁଷ୍କରିଣୀର ଦଶତୁଟ ନିକଟରେ ଉଭୟ ଗାଧୋଉଥିବା ବେଳେ ପୋଖରୀରେ ବୁଡି ଯାଇଥିଲେ । ଖବର ପାଇ ଅଗ୍ନିଶମ ବାହିନୀ ଖୋଜାଖୋଜି କରିବା ପରେ ପୋଖରୀରୁ ୨ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା । ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି ।
ଜିଲ୍ଲା ପ୍ରଶାସନର ବେଖାତିର ମନୋଭାବ ଯୋଗୁଁ ଏଭଳି ଘଟଣା ଘଟିଲା ବୋଲି ଅଭିଯୋଗ ହୋଇଛି । ପୁରୀର ବିଭିନ୍ନ ତୀର୍ଥ ପୁଷ୍କରିଣୀରେ ହଜାର ହଜାର ଶ୍ରଦ୍ଧାଳୁ ପିଣ୍ଡଦାନ କରୁଛନ୍ତି । କିନ୍ତୁ ପ୍ରଶାସନ ପକ୍ଷରୁ କୌଣସି ସୁବ୍ୟବସ୍ଥା କରା ନଯିବା ସହ ପୁଷ୍କରିଣୀ ନିକଟରେ ଲାଇଫ ଗାର୍ଡ ଓ ଲାଇଫ ଜ୍ୟାକେଟ, ଟ୍ୟୁବର ବ୍ୟବସ୍ଥା କରାଯାଇନାହିଁ । ଯେଉଁଥି ପାଇଁ ୨ ଜଣଙ୍କର ମୃତ୍ୟୁ ଘଟିଲା ବୋଲି ଅଭିଯୋଗ ହୋଇଛି ।