କେବେ ସରିବ ଜେଲ ଛକ ରୁ ଧନୁପାଲି ଛକ ରାସ୍ତା ଦୋହରୀକରଣ ନିର୍ମାଣ କାର୍ଯ୍ୟ?
ସମ୍ବଲପୁର:ବର୍ଷ ବିତିଗଲାଣି ତଥାପି ସାରିପାରୁନି ଜେଲ ଛକ ରୁ ଧନୁପାଲି ଛକ ଯାଏ ଦୁଇଥାକିଆ ରାସ୍ତା ଦୋହରୀକରଣ ନିର୍ମାଣ କାର୍ଯ୍ୟ l ଏଥିରୁ ସ୍ୱଷ୍ଟ ଅନୁମେୟ ଯେ ଜିଲ୍ଲା ପ୍ରଶାସନ ସମ୍ବଲପୁର ସହରର ବିକାଶ ପାଇଁ କେତେ ତତ୍ପର l ଦୁର୍ଭାଗ୍ୟ ର ବିଷୟ ଏହି ଯେ ଆଜିବି ଜମି ଅଭିଗ୍ରହଣ ଓ ଜବର ଦଖଲ ଉଛେଦ କାର୍ଯ୍ୟ ସାରିପାରିନାହିଁ ଜିଲ୍ଲା ପ୍ରଶାସନ l ଏବେ ବି ରାସ୍ତା ର ଦୁଇ ପାର୍ଶ୍ଵ ରେ ଡ୍ରେନ ନିର୍ମାଣ ହୋଇପାରିନାହିଁ, ବିଦ୍ୟୁତ ଖୁଣ୍ଟ ସ୍ଥାନାନ୍ତରିତ ହୋଇପାରିନାହିଁ l ବର୍ଷାଧିକ ସମୟ ହେଲା ଗୋବିନ୍ଦତୋଳା ବ୍ରିଜ ରୁ ଗୋବିନ୍ଦତୋଳା ବ୍ରିଜ ଯାଏ ଷ୍ଟ୍ରିଟ ଲାଇଟ ବ୍ୟବସ୍ଥା ହୋଇପାରିନାହିଁ, ଯଦ୍ୱାରା ଏହି ଅଂଚଳ ସମ୍ପୂର୍ଣ୍ଣ ଅନ୍ଧାରରେ ରହୁଛି l ସହରବାସୀ ଙ୍କର ପାଇଁ କାର୍ଯ୍ୟରତ ମହାନଗର ନିଗମ ଏତିପ୍ରତି ଏତେ ଉଦାସୀନ କାହିଁକି ବୋଲି ସାମାଜିକ ଅନୁଷ୍ଠାନ ସକ୍ଷମ ଗଭୀର ଉଦବେଗ ପ୍ରକାଶ କରିଛି l
ସବୁଠୁ ଆଶ୍ଚର୍ଯ୍ୟ ର ବିଷୟ ଏହିଯେ, ହାୱା ମୈଦାନ ପାଖରେ ଅବସ୍ଥିତ ଦ୍ୱାରି ଇଞ୍ଜିନିୟର୍ସ ଓ ଦ୍ୱାରି ପେଟ୍ରୋଲ ପମ୍ପ ସାମ୍ନା ରେ ଥିବା ଡ୍ରେନ ଓ ରାସ୍ତା ଅଧାପନ୍ତରିଆ ହୋଇ ପଡ଼ିରହିଛି l ଯଦ୍ୱାରା ରାସ୍ତା ଟି ଅଣଓସାରିଆ କାରଣରୁ ବିଭିନ୍ନ ସମୟରେ ଛୋଟ ବଡ଼ ଦୁର୍ଘଟଣା ବି ଘଟୁଛି l ବାରମ୍ବାର ଅଭିଯୋଗ ପରେ ଜିଲ୍ଲା ପ୍ରଶାସନ ଓ ପୂର୍ତ୍ତ ବିଭାଗ ପକ୍ଷରୁ ମାପଜୁଖ ଲୋକ ଦେଖାଣିଆ କରାଯାଉଛି,ହେଲେ କୌଣସି ସମାଧାନ ହେବା ଦିଶୁନାହିଁ l ଯଦି ପ୍ରଶାସନ 72 ଫୁଟ ଚଉଡା ରାସ୍ତା ହେବା ନିୟମ କରିଛନ୍ତି ତ ଜମି ଗଲା କୁଆଡେ ବୋଲି ସକ୍ଷମ ପକ୍ଷରୁ କୁହାଯାଇଛି l ଗୋଟିଏ ପଟେ ଟି.ଭି.ଏସ. ସୋରୁମ ଭଙ୍ଗା ଯାଉଛି ଅନ୍ୟ ପଟେ ଇଣ୍ଡିଆ ବଜାର ଭଙ୍ଗା ଯାଉଛି ତ ସେହି ନିର୍ଦ୍ଧିଷ୍ଟ ସ୍ଥାନର ଜମିର ସରକାରୀ ଜମି ଗଲା କୁଆଡେ ବୋଲି ସକ୍ଷମ ପକ୍ଷରୁ ପ୍ରଶ୍ନ ହେଉଛି l କିଛି ଦିନ ପୂର୍ବରୁ ପାର୍ଶ୍ଵ ରେ ଥିବା ଟ୍ରାନ୍ସଫର୍ମର ଓ ସୋଲାର ପ୍ଲାଣ୍ଟ ଚାରିପଟେ ପାଣି ଜମିଥିଲା l ଉତ୍ତରାଞ୍ଚଳ ରାଜସ୍ବ କମିଶନର ଙ୍କର ଦୃଷ୍ଟି ଆକର୍ଷଣ କଲା ପରେ ଦୂଷିତ ପାଣି ନିଷ୍କାସନ ହେଲା, ହେଲେ ସମସ୍ୟା ର ସମାଧାନ ହୋଇପାରିଲା ନାହିଁ l ଏମିତି ଦ୍ୱାରି ଇଞ୍ଜିନିୟର୍ସ ଆଗରେ ଯେମିତି ଜିଲ୍ଲା ପ୍ରଶାସନ ହାତ ଟେକି ଦେଇଛି l ସୂଚନା ଯୋଗ୍ୟ ଯେ, ଦୀର୍ଘ ୫ ଦିନ ହେଲା ୧0 ମିଟର ର ଡ୍ରେନ ନିର୍ମାଣ ପାଇଁ ରାତିରେ ରାସ୍ତା ବନ୍ଦ କରାଯାଉଛି, ତଥାପି ହେଇନି ଡ୍ରେନ ର ନିର୍ମାଣ l
ସରକାରୀ ନିୟମ ଜଣକ ପାଇଁ ଅନ୍ୟ ଜଣକଠୁ ଅଲଗା କାହିଁକି l ଜିଲ୍ଲା ପ୍ରଶାସନ ସମସ୍ତଙ୍କୁ ସମାନ ନଜର ରେ ଦେଖୁ ବୋଲି ସକ୍ଷମ ଜିଲ୍ଲା ପ୍ରଶାସନ ପାଖରେ ଦାବୀ ଜଣାଇବା ସହ ଏହି ଦୀର୍ଘ ମିଆଦି ରାସ୍ତା ନିର୍ମାଣ କାର୍ଯ୍ୟ କୁ ଅନ୍ତିମ ରୂପ ଦେବାକୁ ପଦକ୍ଷେପ ନେବାକୁ ନିବେଦନ କରିଛି।
