କୁକମ ଗ୍ରାମରେ ଆନ୍ତର୍ଜାତିକ ଶ୍ରମିକ ଦିବସ ପାଳିତ
ଜମନକିରା : ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡସ୍ଥ କୁସୁମୀ ଜମନକିରା ଗ୍ରାମ ପଞ୍ଚାୟତ କୁକମ ଗ୍ରାମର ଯାତ୍ରା ମଣ୍ଡପ ଠାରେ ଆନ୍ତର୍ଜାତିକ ଶ୍ରମିକ ଦିବସ ପଶ୍ଚିମ ଓଡ଼ିଶା ଶ୍ରମିକ ସଂଗଠନ ପକ୍ଷରୁ ପାଳିତ ହୋଇ ଯାଇଅଛି। ଏହି ସଭାରେ ପୂର୍ବତନ ବ୍ଲକ ଅଧ୍ୟକ୍ଷ କରୁଣାକର କିସାନ ସଭାପତିତ୍ବ କରିଥିଲେ। ଅବସରପ୍ରାପ୍ତ ଅଧ୍ୟକ୍ଷ ତଥା ସମାଜସେବୀ ସୁବାସ ଚନ୍ଦ୍ର ନାୟକ ମୁଖ୍ୟଅତିଥି ଭାବେ ଯୋଗ ଦେଇ ଦିବସର ମହତ୍ତ୍ଵ ଓ ଶ୍ରମିକ ସମାଜର ଅଧିକାର ସମ୍ପର୍କରେ ଅଭିଭାଷଣ ମାଧ୍ୟମରେ ବୁଝେଇଥିଲେ। ପଶ୍ଚିମ ଓଡ଼ିଶା ଶ୍ରମିକ ସଂଗଠନର ପୂର୍ବତନ ସମ୍ପାଦକ ତଥା ଜିଲ୍ଲା ଶିଶୁ ମଙ୍ଗଳ ସମିତି ସଦସ୍ୟ ପ୍ରଦୀପ ମହାକୁଳ ମୁଖ୍ୟବକ୍ତା ଭାବେ ଯୋଗ ଦେଇ ନିର୍ମାଣ, ଅଣ ସଂଗଠିତ ଶ୍ରମିକ ମାନଙ୍କ ପାଇଁ ରହିଥିବା ସରକାରୀ ଯୋଜନା ଗୁଡିକ ସମ୍ପର୍କରେ ଅବଗତ କରାଇଥିଲେ। ଆଦିବାସୀ ବହୁଳ କୁଚିଣ୍ଡା ଅଞ୍ଚଳରେ ଶ୍ରମିକ ମାନେ ସରକାରୀ ଅବହେଳାର ଶିକାର ହେବା ଘଟଣା ସଂପର୍କରେ ସଭାରେ ଆଲୋଚନା ହୋଇଥିଲା। ବହୁ ସଂଖ୍ୟାରେ ଶ୍ରମିକ ସରକାରଙ୍କ ଠାରେ ପଞ୍ଜିକରଣ ହୋଇପାରୁ ନଥିବାରୁ ସରକାରୀ ଯୋଜନାରୁ ବଞ୍ଚିତ ହେଉଥିବା ବିଷୟରେ ସଭାରେ ଉଦବେଗ ପ୍ରକାଶ ପାଇଥିଲା। କୁଚିଣ୍ଡା ଉପଖଣ୍ଡରେ ଶ୍ରମିକ ମାନଙ୍କ ପଞ୍ଜିକରଣ କରାଯିବ ବୋଲି ପଶ୍ଚିମ ଓଡ଼ିଶା ଶ୍ରମିକ ସଂଗଠନ ପକ୍ଷରୁ ଘୋଷଣା କରାଯାଇଥିଲା। ସଭା ଶେଷରେ ଏକ ସଚେତନତା ପଦଯାତ୍ରା ଶ୍ରମିକ ଅଧିକାର ସୁରକ୍ଷା ସ୍ଲୋଗାନ ସହ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ଗ୍ରାମର ମୁଖ୍ୟ ଜୟପ୍ରକାଶ ନାଏକ, ଏମବିକେ ରଞ୍ଜିତା ରଣା, ଜୟପ୍ରକାଶ ନାୟକ, ହରି କିସାନ, ରଞ୍ଜିତା ରଣା, ନିରାକାର କାଲୋ, ଚନ୍ଦ୍ରାବତି କିସାନ, ରଶ୍ମି ଷଣ୍ଢ, ସୁମିତ୍ରା କିସାନ ଙ୍କ ସମେତ ଗ୍ରାମବାସୀ ବୃନ୍ଦ ଏବଂ ରୋପ ଅନୁଷ୍ଠାନ ଏବଂ ଚାଇଲ୍ଡ ଲାଇନ ଟିମ୍ ମେମ୍ବର ଭୂମିଶ୍ଵେତା ଧୂରୁଆ, ମିଲି ବାଦି ପ୍ରମୁଖ ଅଂଶ ଗ୍ରହଣ କରିଥିଲେ। ଏହା ପରେ ଗ୍ରାମ କମିଟି ସମ୍ପାଦକ ଛବିଳ କିସାନ ଧନ୍ୟବାଦ ଅର୍ପଣ କରିଥିଲେ।
