ଓଡ଼ିଶା ଡଟ୍ ନ୍ୟୁଜ୍

3/04/2025 at 8:52 AM

କଟକ: ଟ୍ବିନସିଟି ଭୁବନେଶ୍ବର ପରେ କଟକରେ ନକଲି ପୋଲିସଙ୍କ କାରନାମା । ହୋମଗାର୍ଡ ଚାକିରି କରାଇ ଦେବାକୁ କହି ଦେଢ଼ ଲକ୍ଷ ଟଙ୍କା ଲାଞ୍ଚ ମାଗୁଥିଲେ ନକଲି ପୋଲିସ ଇନ୍ସପେକ୍ଟର । ମାଡ଼ି ବସିଲା ଅସଲି ପୋଲିସ । ଅଭିଯୁକ୍ତ ଜଣଙ୍କ ହେଲେ ଗୁଣ୍ଡିଚା ଦଳେଇ । ନିଜକୁ କଟକ ଜିଲ୍ଲା ଗ୍ରାମାଞ୍ଚଳ ପୋଲିସର ଜଣେ ଇନ୍ସପେକ୍ଟରର ପରିଚୟ ଦେଇ ହୋମଗାର୍ଡ ଚାକିରି ପାଇଁ ଆଶାୟୀ ଥିବା ଜଣେ ଯୁବକ ଜିତାଂଶୁ ଶେଖର ପରିଡାଙ୍କୁ ଠକିଥିଲେ ।

ଚାକିରି କରାଇ ଦେବାକୁ କହି ଜିତାଂଶୁଙ୍କଠାରୁ ଗୁଣ୍ଡିଚା ହାତେଇ ନେଇଥିଲେ ଦେଢ଼ ଲକ୍ଷ । ଏନେଇ ଥାନାରେ ଅଭିଯୋଗ ପରେ ଗୁଣ୍ଡିଚାଙ୍କୁ ଗିରଫ କରିଛି ବାଦାମବାଡି ଥାନା ପୋଲିସ ।

କଟକ ଡିସିପି କହିଛନ୍ତି, ଅଭିଯୁକ୍ତ ଜଣଙ୍କ ଏହିପରି ପୂର୍ବରୁ ବି ୩୦ରୁ ୪୦ ଜଣଙ୍କୁ ଠକିଛି । ଅଭିଯୁକ୍ତର ବ୍ୟାଙ୍କ୍ ଆକାଉଣ୍ଟରେ ଥିବା ୪ ଲକ୍ଷ ଟଙ୍କା ଫ୍ରିଜ କରାଯାଇଛି । ତା’ ପାଖରୁ ନକଲି ପୋଲିସ ପୋଷାକ, ଟୋପି, ଫେକ୍ ଆଇଡି କାର୍ଡ, ଷ୍ଟାମ୍ପ, ମୋବାଇଲ ଫୋନ୍ ଆଦି ଜବତ କରାଯାଇଛି । ତେବେ କେବଳ ପୋଲିସ ନୁହେଁ, ଆରଆଇ ଅମିନ ଚାକିରି ପାଇଁ ବି ଅଭିଯୁକ୍ତ ଠକେଇ କରୁଥିବା ପୋଲିସ କହିଛି ।