ଆହୁରି ଶକ୍ତିଶାଳୀ ହେବ ନୌସେନା; ଫ୍ରାନ୍ସରୁ ଆସିବ ରାଫେଲ
ନୂଆଦିଲ୍ଲୀ: ଭାରତ ନିରନ୍ତର ତାର ସାମରିକ କ୍ଷମତା ବୃଦ୍ଧି କରୁଛି। ଏହି ପରିପ୍ରେକ୍ଷୀରେ ଭାରତ ଏବଂ ଫ୍ରାନ୍ସ ମଧ୍ୟରେ ନୌସେନା ପାଇଁ ରାଫେଲ ମାରିନ୍ (ଏମ୍) ଯୁଦ୍ଧ ବିମାନ କ୍ରୟ ପାଇଁ ଏକ ଚୁକ୍ତି ସ୍ୱାକ୍ଷରିତ ହେବାକୁ ଯାଉଛି। ଏହି ଚୁକ୍ତି ଅନୁଯାୟୀ ଭାରତୀୟ ନୌସେନାକୁ ୨୬ଟି ରାଫେଲ-ଏମ୍ ଯୁଦ୍ଧ ବିମାନ ଯୋଗାଇ ଦିଆଯିବ। ଏଥିରେ ୨୨ଟି ସିଙ୍ଗଲ୍-ସିଟର୍ ଏବଂ ୪ଟି ଟ୍ୱିନ୍-ସିଟର୍ ତାଲିମ ସଂସ୍କରଣ ଅନ୍ତର୍ଭୁକ୍ତ ହେବ।
ଏହି ଯୁଦ୍ଧ ବିମାନଗୁଡ଼ିକ ଭାରତୀୟ ବିମାନ ବାହକ, INS ବିକ୍ରମାଦିତ୍ୟ ଏବଂ ସ୍ୱଦେଶୀ INS ବିକ୍ରାନ୍ତରୁ ପରିଚାଳିତ ହେବ। ଏହି ବିମାନଗୁଡ଼ିକ ଭାରତୀୟ ସାମୁଦ୍ରିକ ସୀମାର ସୁରକ୍ଷା ପାଇଁ ଏକ ଗେମ ଚେଞ୍ଜର ପ୍ରମାଣିତ ହେବ। ଏହି ବିମାନଗୁଡ଼ିକର ଆନୁମାନିକ ମୂଲ୍ୟ ପ୍ରାୟ ୬୩ ହଜାର କୋଟି ଟଙ୍କା ହେବ ବୋଲି କୁହାଯାଉଛି। ଗଣମାଧ୍ୟମ ରିପୋର୍ଟ ଅନୁସାରେ ଏହି ଚୁକ୍ତିନାମା ଭାରତ ଏବଂ ଫ୍ରାନ୍ସ ପ୍ରତିରକ୍ଷା ମନ୍ତ୍ରୀଙ୍କ ଦ୍ୱାରା ଭର୍ଚୁଆଲ୍ ମାଧ୍ୟମରେ କରାଯିବ। ଦିଲ୍ଲୀରେ ଅନୁଷ୍ଠିତ ହେବାକୁ ଥିବା ସମାରୋହରେ ଫ୍ରାନ୍ସ ରାଷ୍ଟ୍ରଦୂତ ଏବଂ ଭାରତର ପ୍ରତିରକ୍ଷା ସଚିବ ଅଧ୍ୟକ୍ଷତା କରିବେ।
ଫ୍ରାନ୍ସ ପ୍ରତିରକ୍ଷା ମନ୍ତ୍ରୀ ଭିଡିଓ କନଫରେନ୍ସିଂ ମାଧ୍ୟମରେ ଭାରତୀୟ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସହ ଆଲୋଚନାରେ ଅଂଶଗ୍ରହଣ କରିବେ। କୁହାଯାଉଛି ଯେ ଏହି ଉତ୍ସବରେ ଭାରତୀୟ ପ୍ରତିରକ୍ଷା ସଚିବ ରାଜେଶ କୁମାର ଏବଂ ଫ୍ରାନ୍ସ ରାଷ୍ଟ୍ରଦୂତ ଥିଏରୀ ମାଥୋ ମଧ୍ୟ ଉପସ୍ଥିତ ରହିବେ।
