ଜମ୍ମୁର ନାଗ୍ରୋଟାରେ ଫାୟରିଂ, ଜଣେ ଯବାନ ଆହତ
ଶ୍ରୀନଗର: ଜମ୍ମୁର ଏକ ଶିବିର ବାହାରେ ଶନିବାର ଜଣେ ସନ୍ଦିଗ୍ଧ ଆତଙ୍କବାଦୀଙ୍କ ସହ ଏକ ଗୁଳି ବିନିମୟରେ ଜଣେ ସେନା ଯବାନ ଆହତ ହୋଇଛନ୍ତି।
ଜଣେ ଅଧିକାରୀ ଏହି ସୂଚନା ଦେଇଛନ୍ତି। ଅଧିକାରୀ କହିଛନ୍ତି ଯେ ଅଞ୍ଚଳକୁ ସୁରକ୍ଷିତ ରଖିବା ପାଇଁ ଏକ ବଡ଼ ଧରଣର ତଲାସୀ ଅଭିଯାନ ଚାଲିଛି। ଏହି ଘଟଣା ଶନିବାର ବିଳମ୍ବିତ ସନ୍ଧ୍ୟାରେ ଉଚ୍ଚ ସୁରକ୍ଷା ଥିବା ନାଗ୍ରୋଟା ଅଞ୍ଚଳରେ ଘଟିଥିଲା।ଜମ୍ମୁ ସ୍ଥିତ ହ୍ୱାଇଟ୍ ନାଇଟ୍ କର୍ପସ ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି, “ନାଗ୍ରୋଟା ସାମରିକ ଷ୍ଟେସନର ସୀମା ନିକଟରେ ସନ୍ଦେହଜନକ ଗତିବିଧି ଦେଖିବା ପରେ, ସତର୍କ ସେଣ୍ଟିନେଲ୍ ଗତିବିଧିକୁ ଚ୍ୟାଲେଞ୍ଜ କରିଥିଲେ ଯାହା ପରେ କିଛି ସମୟ ପାଇଁ ଗୁଳିଚାଳନା ହୋଇଥିଲା।” ଏଥିରେ ଯବାନ ସାମାନ୍ୟ ଆହତ ହୋଇଥିଲେ।
ହ୍ୱାଇଟ୍ ନାଇଟ୍ କର୍ପସ ଆହୁରି କହିଛି ଯେ ଅନୁପ୍ରବେଶକାରୀଙ୍କୁ ଖୋଜିବା ପାଇଁ ସର୍ଚ୍ଚ ଅପରେସନ ଜାରି ରହିଛି। ଏହି ସମୟରେ ଜଣେ ପୋଲିସ ମୁଖପାତ୍ର ଜମ୍ମୁର ଉପକଣ୍ଠରେ ଥିବା ଆରଏସ ପୁରା ସେକ୍ଟରରେ ଆତଙ୍କବାଦୀଙ୍କ ଉପସ୍ଥିତି ନେଇ ହେଉଥିବା ରିପୋର୍ଟକୁ ଭିତ୍ତିହୀନ ବୋଲି କହିଛନ୍ତି।
