ଆଉ ରାସ୍ତାରେ ରହିବନି ଅଚଳ ଗାଡି; ଦେଖିଲେ ଉଠାଇନେବ ବିଏମ୍ସି
ଭୁବନେଶ୍ବର: ଏଣିକି ରାସ୍ତାରେ ରହିବନି ଅଚଳ ତଥା ବ୍ୟବହାର ହେଉନଥିବା ଗାଡି। ଅଚଳ ତଥା ଅବ୍ୟବହୃତ ଗାଡି ଦେଖିଲେ ବିଏମସି ଉଠାଇ ନେବ। ଏ ନେଇ ବିଏମସି ପକ୍ଷରୁ ଏପରି ନିର୍ଦ୍ଦେଶନାମା ଜାରି କରାଯାଇଛି । ଏହାସହିତ ଖାଦ୍ୟ ବିକ୍ରି ପାଇଁ ବ୍ୟବହୃତ ଠେଲା, କ୍ୟାବିନ୍ ଓ ବ୍ୟବହାର ହେଉନଥିବା ଟାୟାରକୁ ମଧ୍ୟ ବିଏମ୍ସି ଉଠାଇ ନେବ ବୋଲି ସୂଚନା ମିଳିଛି। ରାସ୍ତା କଡରେ ଆଉ ଏସବୁ ଜିନିଷ ରଖିହେବ ନାହିଁ। ଏସବୁ କରୁଥିବା ମାଲିକଙ୍କୁ ବିଏମସି ପକ୍ଷରୁ ୭ ଦିନିଆ ନୋଟିସ୍ ଦିଆଯିବ । ଏହି ସମୟ ଭିତରେ ଗାଡି ନହଟାଇଲେ ବିଏମସି ଆସି ଗାଡି ଉଠାଇନେବ ବୋଲି କୁହାଯାଇଛି ।
ଦୀର୍ଘ ଦିନ ଧରି ରାସ୍ତା କଡ଼ରେ ଏସବୁ ପଡ଼ିରହିଲେ ପରିମଳ ସ୍ଥିତି ଖରାପ ହେଉଛି । ରାସ୍ତା ସଫା କରିବାରେ ସଫେଇ କର୍ମଚାରୀ ସମସ୍ୟା ଭୋଗଉଛନ୍ତି ବୋଲି ବିଏମସି ପକ୍ଷରୁ କୁହାଯାଇଛି ।
