ଗେଟ୍ ପରୀକ୍ଷାରେ ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ଅଧିକାର କଲେ ଭିସୁଟ୍ ଛାତ୍ରୀ ଏକତା ପ୍ରିୟଦର୍ଶିନୀ

ସମ୍ବଲପୁର ପ୍ରତିନିଧି

ସମ୍ବଲପୁର:ଚଳିତ ବର୍ଷର ପ୍ରତିଷ୍ଠିତ ଜାତୀୟ ସ୍ତରର ‘ଗେଟ୍’ (ପରୀକ୍ଷାରେ ବୁର୍ଲା ସ୍ଥିତ ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟ (ଭିସୁଟ)ର କେମିକାଲ ଇଞ୍ଜିନିୟରିଂ ବିଭାଗର ଶେଷ ବର୍ଷର ଛାତ୍ରୀ ଏକତା ପ୍ରିୟଦର୍ଶିନୀ ଅଭୂତପୂର୍ବ ସଫଳତା ହାସଲ କରିଛନ୍ତି l ସେ ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ଅଧିକାର କରି ଓଡ଼ିଶା ତଥା ନିଜ ବିଶ୍ୱବିଦ୍ୟାଳୟ କୁ ଜାତୀୟ ସ୍ତରରେ ପ୍ରତିଷ୍ଠିତ କରାଇଛନ୍ତି l
ଏହି ଖବର ପ୍ରସାରିତ ହେବା ପରେ ଭିସୁଟ୍‌ର ଅଧ୍ୟାପକ, କର୍ମଚାରୀ ଏବଂ ଛାତ୍ରଛାତ୍ରୀଙ୍କ ମହଲରେ ଖୁସିର ଲହରୀ ଖେଳିଯାଇଛି l ସାଧାରଣତଃ ଆଜିର ଯୁବପିଢ଼ି କମ୍ପ୍ୟୁଟର ସାଇନ୍ସ ଆଡ଼କୁ ଅଧିକ ଆକର୍ଷିତ ହେଉଥିବା ବେଳେ, ଏକତା କୋର୍ ଇଞ୍ଜିନିୟରିଂ କ୍ଷେତ୍ରରେ ନିଜର ଦକ୍ଷତା ପ୍ରତିପାଦିତ କରି ସମସ୍ତଙ୍କ ପାଇଁ ପ୍ରେରଣା ସାଜିଛନ୍ତି l ନିଜର ଏହି ସଫଳତାର ଶ୍ରେୟ ସେ ନିଜର ମାତାପିତା, ଗୁରୁଜନ ଏବଂ କଠିନ ପରିଶ୍ରମକୁ ଦେଇଛନ୍ତି l
ଏକତା ଙ୍କର ଏହି ବିଶେଷ ସଫଳତା ପାଇଁ ଭିସୁଟ୍ କର୍ତ୍ତୃପକ୍ଷଙ୍କ ସମେତ ବିଭିନ୍ନ ମହଲରୁ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି l ଆଗାମୀ ଦିନରେ ଦେଶର କୌଣସି ପ୍ରତିଷ୍ଠିତ ସାଧାରଣ ଉଦ୍ୟୋଗ ରେ ଯୋଗଦେଇ ଦେଶ ଗଠନରେ ନିଜର ଯୋଗଦାନ ଦେବାକୁ ତାଙ୍କର ଲକ୍ଷ୍ୟ ବୋଲି କୁହନ୍ତି ଏକତା ପ୍ରିୟଦର୍ଶିନୀ।