ମୁଖ୍ୟମନ୍ତ୍ରୀ ଅନ୍ନପୂର୍ଣ୍ଣା ଯୋଜନା ର ଶୁଭାରମ୍ଭ,ଜିଲ୍ଲାସ୍ତରୀୟ କାର୍ଯ୍ୟକ୍ରମ
ସମ୍ବଲପୁର:ରାଜ୍ୟସ୍ତରୀୟ କାର୍ଯ୍ୟକ୍ରମ ରେ ମୁଖ୍ୟମନ୍ତ୍ରୀ, ଓଡିଶା ସରକାର ମୋହନ ଚରଣ ମାଝୀ ଭୁବନେଶ୍ୱର ଠାରେ ମୁଖ୍ୟମନ୍ତ୍ରୀ ଅନ୍ନପୂର୍ଣ୍ଣା ଯୋଜନା ର ଶୁଭାରମ୍ଭ କରିଛନ୍ତି l ଏହିପରିପେକ୍ଷି ରେ ସମ୍ବଲପୁର ଜିଲ୍ଲା ପ୍ରଶାସନ ଆନୁକୁଲ୍ୟ ରେ ସ୍ଥାନୀୟ ତପସ୍ଵିନୀ ପ୍ରେକ୍ଷାଳୟ ଠାରେ ଏକ ଜିଲ୍ଲା ସ୍ତରୀୟ କାର୍ଯ୍ୟକ୍ରମ ଆୟୋଜିତ ହୋଇଯାଇଛି l ଏହି କାର୍ଯ୍ୟକ୍ରମ ରେ ମୁଖ୍ୟ ଅତିଥି- ମାନ୍ୟବର ପଞ୍ଚାୟତିରାଜ ଓ ପାନୀୟଜଳ ଓ ଗ୍ରାମ୍ୟ ଉନ୍ନୟନ ବିଭାଗ ମନ୍ତ୍ରୀ ତଥା କୁଚିଣ୍ଡା ବିଧାୟକ ଙ୍କ ପ୍ରତିନିଧି ବିଭୂତି କଲ୍ୟାଣ ପଟେଲ, ସମ୍ବଲପୁର ଜିଲ୍ଲାପାଳ ସିଦ୍ଧେଶ୍ଵର ବଳିରାମ ବୋନ୍ଦର, ଅତିରିକ୍ତ ଜିଲ୍ଲପାଳ(ସାଧାରଣ ) ଅଶୋକ କୁମାର ଭୋଇ, ସମ୍ବଲପୁର ମହାନଗର ନିଗମ ର ଆୟୁକ୍ତ ରେହାନ ଖତ୍ରୀ ଙ୍କ ସମେତ ମୁଖ୍ୟ ଯୋଗାଣ ଅଧିକାରୀ, ଅନ୍ୟ ବିଭାଗୀୟ ଅଧିକାରୀ, ଜନସାଧାରଣ ପ୍ରମୁଖ ଉପସ୍ଥିତ ରହି ଆଭାସୀ ମାଧ୍ୟମରେ ସମାରୋହ ରେ ଯୋଗ ଦେଇଥିଲେ l
ସମ୍ବଲପୁର ଜିଲ୍ଲାପାଳ ଶ୍ରୀ ବୋନ୍ଦର ଙ୍କ ସୂଚନା ଅନୁଯାୟୀ, ଏହି ଫ୍ଲାଗସିପ୍ କାର୍ଯ୍ୟକ୍ରମ ଅଧୀନରେ ଜିଲ୍ଲାର ସମସ୍ତ ଯୋଗ୍ୟ ରେସନ ହିତାଧିକାରୀଙ୍କୁ ସେମାନଙ୍କ ନିୟମିତ ପ୍ରାପ୍ୟ ବ୍ୟତୀତ ମାସିକ ମୁଣ୍ଡପିଛା (ପ୍ରତି ହିତାଧିକାରୀ) ଅତିରିକ୍ତ ୫ କିଲୋଗ୍ରାମ ଚାଉଳ ସମ୍ପୂର୍ଣ୍ଣ ବିନା ମୂଲ୍ୟରେ ପ୍ରଦାନ କରାଯିବ l
ରାଜ୍ୟ ଖାଦ୍ୟ ସୁରକ୍ଷା କ୍ଷେତ୍ରରେ ଏହା ଏକ ଐତିହାସିକ ପଦକ୍ଷେପ ଏବଂ ଏହା ଦ୍ୱାରା ଜିଲ୍ଲାର ଖାଦ୍ୟ ସୁରକ୍ଷା ବ୍ୟବସ୍ଥା ଆହୁରି ସଦୃଢ଼ ହେବ ବୋଲି କହିଥିଲେ l କେବଳ ସେତିକି ନୁହେଁ ସାରା ଭାରତ ରେ ଓଡ଼ିଶା ଏକମାତ୍ର ରାଜ୍ୟ ଯେଉଁଠି ଏହି ଯୋଜନା ରେ ପ୍ରତି ହିତାଧିକାରୀ ଙ୍କୁ ୧୦ କେଜି ଚାଉଳ ସରକାର ଙ୍କ ଦ୍ଵାରା ପ୍ରଦାନ କରାଯିବ ବୋଲି ସୂଚନା ଦେଇଥିଲେ l ଖାଦ୍ୟ ସୁରକ୍ଷା ଯୋଜନା ସହ ସରକାରଙ୍କ ଡିଜିଟାଲ୍ ସଶକ୍ତିକରଣ କାର୍ଯ୍ୟକ୍ରମ ଅଧୀନରେ ଜିଲ୍ଲାର ଅଙ୍ଗନବାଡ଼ି କର୍ମୀମାନଙ୍କୁ ସ୍ମାର୍ଟଫୋନ୍ (Smart phone) ବିତରଣ କରାଯାଉଛି l ଏହାଦ୍ୱାରା ଆମର ଅଙ୍ଗନବାଡ଼ି ଦିଦିମାନେ ଆହୁରି “ସ୍ମାର୍ଟ” ହେବା ସହ ସରକାରୀ ଯୋଜନା ଗୁଡ଼ିକର ଡିଜିଟାଲ୍ ପରିଚାଳନା ତଥା ତୃଣମୂଳ ସ୍ତରରେ ଶିଶୁ ଓ ମହିଳାମାନଙ୍କ ବିକାଶ କାର୍ଯ୍ୟ ଅଧିକ ସ୍ୱଚ୍ଛ ଏବଂ ଦ୍ରୁତ ହୋଇପାରିବ ବୋଲି କହିଥିଲେ l
ଜିଲ୍ଲାପାଳ ସମ୍ବଲପୁରବାସୀଙ୍କୁ ଏହି ସମସ୍ତ ଜନକଲ୍ୟାଣକାରୀ ଯୋଜନାର ସଦୁପଯୋଗ କରିବାକୁ ଅନୁରୋଧ କରିଛନ୍ତି l
ବିନା ମୂଲ୍ୟରେ ଅତିରିକ୍ତ ଚାଉଳ- ଜାତୀୟ ଖାଦ୍ୟ ସୁରକ୍ଷା ଆଇନ (NFSA-PMGKAY) ଏବଂ ରାଜ୍ୟ ଖାଦ୍ୟ ସୁରକ୍ଷା ଯୋଜନା (SFSS) ଅନ୍ତର୍ଗତ ସମସ୍ତ ଯୋଗ୍ୟ ହିତାଧିକାରୀଙ୍କୁ ଏହି ଅତିରିକ୍ତ ୫ କେଜି ଚାଉଳ ପାଇଁ ଗୋଟିଏ ହେଲେ ଟଙ୍କା ଦେବାକୁ ପଡ଼ିବ ନାହିଁ l ଏହି ଯୋଜନା ଚଳିତ ବର୍ଷ ଏପ୍ରିଲ ମାସଠାରୁ ଲାଗୁ କରାଯାଇଛି l ହିତାଧିକାରୀମାନେ ଏକକାଳୀନ ଏପ୍ରିଲ, ମେ ଏବଂ ଜୁନ ମାସର ମୋଟ ୧୫ କିଲୋଗ୍ରାମ ଚାଉଳ ସେମାନଙ୍କ ନିକଟସ୍ଥ ସରକାରୀ ଖୁଚୁରା ବିକ୍ରୟ କେନ୍ଦ୍ରରୁ ପାଇପାରିବେ l
ଏହି ଯୋଜନା ରେ ସମ୍ବଲପୁର ଜିଲ୍ଲାରୁ ଉପକୃତ ହେବେ ୭.୫ ଲକ୍ଷରୁ ଅଧିକ ଜନସାଧାରଣ l ସମ୍ବଲପୁର ଜିଲ୍ଲାର ମୋଟ ୨,୩୭,୨୩୮ ଟି ରେସନ କାର୍ଡଧାରୀ ପରିବାରର ୭,୫୪,୮୨୨ ଜଣ ହିତାଧିକାରୀ ଏହି ଯୋଜନାର ପ୍ରତ୍ୟକ୍ଷ ଲାଭ ପାଇବେ l ଏହି ଯୋଜନା ମାଧ୍ୟମରେ ଜିଲ୍ଲା ପାଇଁ ମାସିକ ପ୍ରାୟ ୩୭ ଲକ୍ଷ କିଲୋଗ୍ରାମ (୩୭,୭୪୧.୧୦ କ୍ୱିଣ୍ଟାଲ) ଚାଉଳ ଆବଣ୍ଟନ କରାଯାଉଛି l ସମ୍ବଲପୁର ଜିଲ୍ଲାର ମୋଟ ୨୧୦ ଟି ସରକାରୀ ଖୁଚୁରା ବିକ୍ରୟ କେନ୍ଦ୍ର ମାଧ୍ୟମରେ ଏହି ଚାଉଳ ବଣ୍ଟନ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
