ବଲାଙ୍ଗୀର ଜିଲ୍ଲା ମୁରିବାହାଲ ସରସ୍ବତୀ ଶିଶୁ ମନ୍ଦିରରେ ସାମୁହିକ ପିତୃ-ମାତୃ ସମ୍ମିଳନୀ ଅନୁଷ୍ଠିତ: ଶୃଙ୍ଖଳା, ସଂସ୍କାର ଓ ଉତ୍ସାହର ସହ ସମ୍ପନ୍ନ ।
ବଲାଙ୍ଗୀର,୧୪।୧୧: ବଲାଙ୍ଗୀର ଜିଲ୍ଲା ମୁରିବାହାଲ ସ୍ଥିତ ସରସ୍ବତୀ ଶିଶୁ ମନ୍ଦିର ପରିସରରେ ଚଳିତ ବର୍ଷର ସାମୁହିକ ‘ପିତୃ-ମାତୃ ସମ୍ମିଳନୀ’ ଅତ୍ୟନ୍ତ ଆଡ଼ମ୍ବର ଏବଂ ଉତ୍ସାହଜନକ ପରିବେଶରେ ଅନୁଷ୍ଠିତ ହୋଇଯାଇଛି। ବିଦ୍ୟାଳୟର ଏହି ଗାର୍ହିକ ତଥା ନୈତିକ କାର୍ଯ୍ୟକ୍ରମରେ ବହୁ ସଂଖ୍ୟାରେ ମାନ୍ୟବର ପିତାମାତା ଉପସ୍ଥିତ ରହି କାର୍ଯ୍ୟକ୍ରମକୁ ସାଫଲ୍ୟମଣ୍ଡିତ କରିଥିଲେ।
ଏଥିରେ ଟିଟିଲାଗଡ଼ ସଂକୁଳ ପ୍ରମୁଖ ତଥା ବିଶିଷ୍ଟ ବ୍ୟଙ୍ଗ କବି ଶ୍ରୀଯୁକ୍ତ ଟିକେଲାଲ ବେହେରା ମୁଖ୍ୟ ଅତିଥି ଏବଂ ସ୍ଥାନୀୟ ବାବା ମଠର ସାଧୁ ଶ୍ରୀ ସୁଶୀଲ ଦାସ ସମ୍ମାନିତ ଅତିଥି ଭାବେ ଯୋଗଦାନ କରିଥିଲେ ।
ଅନ୍ୟ ମାନଙ୍କ ମଧ୍ୟରେ ଏଥିରେ ପରିଚାଳନା ସମିତିର ସମ୍ପାଦକ ଭରତ ଦାସ, ଉପସଭାପତି ଶିବ ଧରୁଆ, ସଦସ୍ୟା ସୁନିତା ଦାଶ ଏବଂ ସଦସ୍ୟା କ୍ଷିତିସୁତା ତାଣ୍ଡି ପ୍ରମୁଖ ମଞ୍ଚାସୀନ ରହି ସଭାର ଶୋଭାବର୍ଦ୍ଧନ କରିଥିଲେ।
ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ସୁମନା ନନ୍ଦ ଖମାରୀ ସ୍ବାଗତ ଭାଷଣ ସହ ଅତିଥିମାନଙ୍କର ପରିଚୟ ପ୍ରଦାନ କରିଥିଲେ। ଆଚାର୍ଯ୍ୟ ଗୋବିନ୍ଦ ଚନ୍ଦ୍ର ଦାଶ ସମ୍ପୂର୍ଣ୍ଣ କାର୍ଯ୍ୟକ୍ରମକୁ ସୁଚାରୁରୂପେ ପରିଚାଳନା କରିଥିଲେ ଏବଂ ଯୁଗ୍ମ ସମ୍ପାଦକ ସୁବାଷ ଚନ୍ଦ୍ର ପଟନାୟକ ଧନ୍ୟବାଦ ଅର୍ପଣ କରିଥିଲେ।
ସଭା ଶେଷରେ ଉପସ୍ଥିତ ପିତାମାତାଙ୍କ ପାଇଁ ଏକ ମନୋରଞ୍ଜନଧର୍ମୀ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ମାଆମାନଙ୍କ ପାଇଁ ‘ବାଟି-ଚାମଚ’ ଏବଂ ବାପାମାନଙ୍କ ପାଇଁ ‘ଚା କପରେ ବେଲୁନ ଫିଙ୍ଗା’ ପ୍ରତିଯୋଗିତା ଅତି ଆନନ୍ଦଦାୟକ ପରିବେଶ ସୃଷ୍ଟି କରିଥିଲା, ଯେଉଁଥିରେ ସମସ୍ତେ ବେଶ୍ ଉତ୍ସାହର ସହ ଅଂଶଗ୍ରହଣ କରିଥିଲେ।
ଏହି ସାମୁହିକ କାର୍ଯ୍ୟକ୍ରମକୁ ସଫଳ କରିବାରେ ବିଦ୍ୟାଳୟର ଗୁରୁଜୀ-ଗୁରୁମା ତଥା ସେବକ-ସେବିକାମାନେ ସକ୍ରିୟ ସହଯୋଗ କରିଥିଲେ। ସେମାନଙ୍କ ମଧ୍ୟରେ ନିଳେନ୍ଦ୍ରି ନାଗ, ଭଗବାନ ପଧାନ, ଜ୍ୟୋତିର୍ମୟୀ ଛନ୍ଦ, ସଂଯୁକ୍ତା ମହାକୁର, ଅନିତା ନାଏକ, ଜରିତା ନାଏକ, ସୋନିଆ ଭୋଇ, ମଞ୍ଜୁ ସେଠି, ଡଲି ମାଝୀ, ସ୍ଵାତିଶୀ ସାହୁ ଏବଂ କଳ୍ପନା ଡାଙ୍ଗ ପ୍ରମୁଖ ସମସ୍ତ ବ୍ୟବସ୍ଥାକୁ ତଦାରଖ କରିଥିଲେ।
