ଡିସେମ୍ବର ପହିଲାରୁ ବଢିବ ଶୀତ, ରାତିରେ କମିବ ପାରଦ
ଭୁବନେଶ୍ୱର: ଡିସେମ୍ବର ପ୍ରଥମ ସପ୍ତାହରେ ରାଜ୍ୟରେ ଶୀତର ପ୍ରକୋପ ବଢ଼ିବ । ଏହା ପ୍ରଭାବରେ ୧ ତାରିଖରୁ ଆଭ୍ୟନ୍ତରୀଣ ଦକ୍ଷିଣ ଓ କେନ୍ଦ୍ରୀୟ ଓଡ଼ିଶାରେ ରାତିର ତାପମାତ୍ରା ୩ରୁ ୪ଡିଗ୍ରୀ କମିବ । ସେହିପରି ଉତ୍ତର ଆଭ୍ୟନ୍ତରଣରେ ୨ଡିଗ୍ରୀ ପାରଦ କମିପାରେ । ଉପକୂଳ ଓଡ଼ିଶାରେ ଡିସେମ୍ବର ପହିଲାରୁ ସର୍ବନିମ୍ନ ତାପମାତ୍ରା ଅପରିବର୍ତ୍ତିତ ରହିବ ।
ପାଣିପାଗ ବିଭାଗ ଅନୁଯାୟୀ, ଆସନ୍ତା ୨୫ ତାରିଖରେ କେନ୍ଦ୍ରୀୟ ଦକ୍ଷିଣ ବଙ୍ଗୋପସାଗର ଓ ସଂଲଗ୍ନ ଦକ୍ଷିଣ ପୂର୍ବ ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହେବ। ଏହା ୨୭ରେ ଲଘୁଚାପରେ ପରିଣତ ହେବ ଏବଂ ୨୮ରେ ଅବପାତ ପରିଣତ ହେବା ସହ ୩୦ରେ ବାତ୍ୟା ରୂପ ନେବ। ଡିସେମ୍ବର ୨ରେ ଏହା ବାଂଲାଦେଶର ଦକ୍ଷିଣ ଉପକୂଳକୁ ସ୍ପର୍ଶ କରିବ । ତେବେ ସମ୍ଭାବ୍ୟ ବାତ୍ୟାର କୌଣସି ପ୍ରଭାବ ଓଡ଼ିଶା ଉପରେ ପଡ଼ିବ ନାହିଁ। ଏହି ବାତ୍ୟା ପରେ ରାଜ୍ୟରେ ଶୀତର ପ୍ରକୋପ ବଢିବ।
