ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

17/01/2024 at 1:46 PM

ପୁରୀ: ଗୋଟିଏ ପଟେ ଶ୍ରୀ ମନ୍ଦିର ପରିକ୍ରମା ପ୍ରକଳ୍ପକୁ ନେଇ ପୁରୀରେ ଆଧ୍ୟାତ୍ମିକ ପରିବେଶ ଲାଗି ରହିଥିବା ବେଳେ ମନ୍ତ୍ରୋପଚାରରେ ଶ୍ରୀକ୍ଷେତ୍ର କମ୍ପି ଉଠୁଛି। ଅନ୍ୟପଟେ ରତ୍ନଭଣ୍ଡାରକୁ ନେଇ କେଁ ଦେଖା ଦେଇଛି । ରତ୍ନଭଣ୍ଡାର ଚାବି ହଜିବା ନେଇ କମିଶନ ରିପୋର୍ଟ ସାର୍ବଜନୀନ ମାମଲାରେ ଷ୍ଟାଟସ ରିପୋର୍ଟ ଦାଖଲ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ୨/୩ ଦିନ ଭିତରେ ରିପୋର୍ଟ ଦେବାକୁ ଅନୁମତି ଲୋଡିଛନ୍ତି ସରକାର । ମାମଲାର ପରବର୍ତୀ ଶୁଣାଣି ୨ ସପ୍ତାହ ପରେ ହେବ ବୋଲି ହାଇକୋର୍ଟ କହିଛନ୍ତି ।

ସୂଚନାଯୋଗ୍ୟ, ରତ୍ନଭଣ୍ଡାର ଚାବି ହଜିବା ପ୍ରସଙ୍ଗ ହାଇକୋର୍ଟରେ ବିଚାରଧୀନ ରହିଛି । ଏହାକୁ ନେଇ ରାଜ୍ୟ ସରକାର ଅକଳରେ ମଧ୍ୟ ପଡିଛନ୍ତି । ବିରୋଧୀ ରାଜ୍ୟ ସରକାରଙ୍କୁ ଘେରିବା ସହ ଏହା ଉପରେ ସରକାର ସ୍ପଷ୍ଟ କରନ୍ତୁ ବୋଲି ଦାବି କରି ଆସିଛନ୍ତି । ରତ୍ନଭଣ୍ଡାର ଚାବି ହଜିବା ଘଟଣାରେ ଶ୍ରୀମନ୍ଦିର ପ୍ରଶାସନ ଓ ଜିଲ୍ଲାପାଳଙ୍କ କାର୍ଯ୍ୟଶୈଳୀକୁ ନେଇ ଅଙ୍ଗୁଳି ଉଠିଥିଲା ।

ରତ୍ନଭଣ୍ଡାର ରାବି ପ୍ରସଙ୍ଗରେ ବିଜେପି ହାଇକୋର୍ଟରେ ପିଟିସନ ଦାୟର କରିଥିଲା । ମଝିରେ ନକଲି ଚାବି ମିଳିଥିବା ଖବର ସାମ୍ନାକୁ ଆସିଥିଲା । ନକଲି ନୁହେଁ ପ୍ରକୃତ ଚାବି କେଉଁଠି ଅଛି ତାକୁ ନେଇ ଶ୍ରୀମନ୍ଦିର ପ୍ରଶାସକ ଓ ରାଜ୍ୟ ସରକାରଙ୍କଠୁ ଉତର ଲୋଡିଥିଲେ ସାଧାରଣ ଜନତା ଓ ବିରୋଧୀ । ତେବେ ଗତ ବର୍ଷ ଏହି ପ୍ରସଙ୍ଗରେ ଆଇନ ମନ୍ତ୍ରୀଙ୍କ ଅଜବ ବୟାନ ସାମ୍ନାକୁ ଆସିଥିଲା । ସେ କହିଥିଲେ ଚାବି ହଜିଛି କିନାହିଁ ଆମେ ଜାଣିନୁ ।

ସେ ଆହୁରି ମଧ୍ୟ କହିଛନ୍ତି ଯେ, ମୁଁ ଆଜି ପର‌୍ୟ୍ୟନ୍ତ ଯେତିକି ଜାଣିଛି, ରତ୍ନ ଭଣ୍ଡାର ଚାବି ହଜିଛି କି ନହଜିଛି ଆମେ ସେ ବିଷୟରେ ଜାଣିନୁ । ରାଜ୍ୟ ସରକାର ବିଭିନ୍ନ ସ୍ତରରେ ଶ୍ରୀମନ୍ଦିର ଉନ୍ନତି ପାଇଁ ପଦକ୍ଷେପ ନେଉଛନ୍ତି । ହାଇକୋର୍ଟଙ୍କ ପକ୍ଷରୁ ଯାହା ନିର୍ଦ୍ଦେଶ ଆସିବ ତା ଉପରେ ବିଚାରବିମର୍ଶ କରିବେ ରାଜ୍ୟ ସରକାର। ଏହାପରେ ଯାଇ କୌଣସି ପଦକ୍ଷେପ ନେବେ ରାଜ୍ୟ ସରକାର । କିନ୍ତୁ ସରକାର ମନ୍ଦିର ଗୁଡ଼ିକର ଉନ୍ନତିକରଣ ଲାଗି ପ୍ରତିଶ୍ରୁତିବଦ୍ଧ ବୋଲି କହିଥିଲେ ଆଇନମନ୍ତ୍ରୀ ।