ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

16/02/2024 at 12:01 PM

ନୂଆଦିଲ୍ଲୀ: ସୁପ୍ରିମକୋର୍ଟଙ୍କ ସାମ୍ବିଧାନିକ ଖଣ୍ଡପୀଠ ଗୁରୁବାର ରାଜନୈତିକ ଦଳଗୁଡିକର ନିର୍ବାଚନୀ ଫଣ୍ଡିଂ ପାଇଁ ଛଅ ବର୍ଷ ପୂର୍ବେ ଆରମ୍ଭ କରାଯାଇଥିବା ଇଲେକ୍ଟୋରାଲ ବଣ୍ଡକୁ ଗୁରୁବାର ଅସାମ୍ବିଧାନିକ ଦର୍ଶାଇ ତତ୍କାଳ ପ୍ରଭାବରୁ ରୋକ୍ ଲଗାଇଛନ୍ତି । ଏହା ସହିତ ଗୁପ୍ତ ଭାବେ ଦାନ କରାଯାଇଥିବା ସମସ୍ତ ଅର୍ଥ ଓ ତଥ୍ୟ ନିର୍ବାଚନ ଆୟୋଗଙ୍କୁ ପ୍ରଦାନ କରିବାକୁ ଷ୍ଟେଟ୍ ବ୍ୟାଙ୍କ ଅଫ ଇଣ୍ଡିଆକୁ ନିର୍ଦ୍ଦେଶ ଦେଇଛନ୍ତି । ଆଉ ଏବେ କୋର୍ଟଙ୍କ ଦସ୍ତାବିଜରୁ ଖୁଲାସା ହୋଇଛି ଯେ, ଛଅ ବର୍ଷ ଅବଧିରେ ଇଲେକ୍ଟୋରାଲ ବଣ୍ଡରୁ କେନ୍ଦ୍ରର କ୍ଷମତାସୀନ ବିଜେପିକୁ ସବୁଠୁ ଅଧିକ ଚାନ୍ଦା ମିଳିଛି ।

୨୦୧୭-୧୮ରେ ଆରମ୍ଭ କରାଯାଇଥିବା ନିର୍ବାଚନୀ ବଣ୍ଡ ସ୍କିମର ଗତ ୬ ବର୍ଷର ବାର୍ଷିକ ଅଡିଟ୍ ରିପୋର୍ଟରୁ ଜଣା ପଡିଛି ଯେ, ବିଜେପିକୁ ସବୁଠୁ ଅଧିକ ୬୫୬୬ କୋଟି ଟଙ୍କାର ଗୁପ୍ତ ଦାନ ମିଳିଛି । ମୁଖ୍ୟ ବିରୋଧୀ ଦଳ କଂଗ୍ରେସ ଦ୍ୱିତୀୟ ସ୍ଥାନରେ ରହିଛି । ମାତ୍ର ଦଳକୁ କେବଳ ୧୧୨୩ କୋଟି ଟଙ୍କା ମିଳିଛି। ତାଲିକାର ତୃତୀୟ ସ୍ଥାନରେ ରହିଛି ମମତା ବାନାର୍ଜୀଙ୍କ ଟିଏମସି, ଯାହାକୁ ୧୦୯୨ କୋଟି ଟଙ୍କା ମିଳିଛି । ସବୁଠୁ ବଡ କଥା ଟିଏମସି କେବଳ ପଶ୍ଚିମବଙ୍ଗରେ କ୍ଷମତାସୀନ ଥାଇ ଏତେ ଅର୍ଥ ପାଇଛି ।

କୋର୍ଟକୁ ପ୍ରଦତ ଦସ୍ତାବିଜରୁ ଜଣା ପଡିଛି ଯେ, ସିପିଆଇ(ଏମ) ଏକମାତ୍ର ରାଷ୍ଟ୍ରୀୟ ପାର୍ଟି ଯିଏ ନିର୍ବାଚନୀ ବଣ୍ଡ ମାଧ୍ୟମରେ ଚାନ୍ଦା ସ୍ୱୀକାର କରେ ନାହିଁ । ତାଲିକାର ଚତୁର୍ଥ ସ୍ଥାନରେ ରହିଛି ଓଡିଶାର ଶାସକ ବିଜୁ ଜନତା ଦଳ । ନବୀନ ପଟ୍ଟନାୟକଙ୍କ ଏହି ପାର୍ଟିକୁ ୭୭୪ କୋଟି ଟଙ୍କା ଚାନ୍ଦା ଭାବେ ମିଳିଛି । ତାମିଲନାଡୁରେ କ୍ଷମତାସୀନ ଡିଏମକେ ପଂଚମରେ ରହିଛି ଏବଂ ଦଳକୁ ୬୧୫ କୋଟି ଟଙ୍କା ନିର୍ବାଚନୀ ବଣ୍ଡ ଜରିଆରେ ମିଳିଛି ।

ତେଲେଙ୍ଗାନାରେ ଗତ ୧୦ ବର୍ଷ ଧରି କ୍ଷମତାରେ ଥିବା ଭାରତ ରାଷ୍ଟ୍ର ସମିତି(ବିଆରଏସ) ତାଲିକାରେ ଷଷ୍ଠ ସ୍ଥାନରେ ରହିଛି । ଦଳକୁ ଗତ ୬ ବର୍ଷରେ ମୋଟ୍ ୩୮୩ କୋଟି ଟଙ୍କା ଚାନ୍ଦା ରୂପେ ମିଳିଛି । ଏହି ତାଲିକାରେ ସପ୍ତମ ସ୍ଥାନରେ ଆନ୍ଧ୍ର ପ୍ରଦେଶରେ ସରକାରରେ ଥିବା ୱାଇଏସଆର କଂଗ୍ରେସ ରହିଛି । ଜଗନମୋହନ ରେଡ୍ଡୀଙ୍କ ପାର୍ଟିକୁ ଛଅ ବର୍ଷରେ ନିର୍ବାଚନୀ ବଣ୍ଡ ଜରିଆରେ ମୋଟ୍ ୩୮୨ କୋଟି ଟଙ୍କା ମିଳିଛି । ତାଙ୍କ ପ୍ରତିଦ୍ୱନ୍ଦ୍ୱୀ ପୂର୍ବତନ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁଙ୍କ ଟିଡିପିକୁ ୧୪୬ କୋଟି ଟଙ୍କା ମିଳିଛି । ନବମରେ ୧୦୧ କୋଟି ସହ ଶିବସେନା ଏବଂ ୯୪ କୋଟି ଟଙ୍କା ସହ ଦଶମରେ ରହିଛି ଆମ୍ ଆଦମୀ ପାର୍ଟି । ଆପକୁ ପ୍ରଥମ ଦୁଇ ବର୍ଷରେ କୌଣସି ଚାନ୍ଦା ମିଳି ନ ଥିଲା ।

ଟପ୍ ୧୦ ଦଳକୁ ମିଳିଥିବା ଚାନ୍ଦା

ବିଜେପି – ୬୫୬୬.୧୨
କଂଗ୍ରେସ – ୧୧୨୩.୩୧
ଟିଏମସି – ୧୦୯୨.୯୮
ବିଜେଡି – ୭୭୪
ଡିଏମକେ – ୬୧୬
ଟିଆରଏସ – ୩୮୩.୬୫
ୱାଇଏସଆର – ୩୮୨.୬୫
ଟିଡିପି – ୧୪୬.୬
ଏସଏଚଏସ – ୧୦୧.୩୮
ଆପ୍ – ୯୪.୨୮