ସୌମିତ୍ରି ମେହେର

5/07/2024 at 10:37 AM

ବୀରମହାରାଜପୁର : (ସୌମିତ୍ରି ମେହେର )
ଅଭାବରେ ପଡିଲେ ଅର୍ଥ ରୋଜଗାର ପାଇଁ ବିଭିନ୍ନ କାମ କରିବା ପାଇଁ ବାଧ୍ୟ ହୁଅନ୍ତି ଲୋକ I ଏକ ଅଭାବନୀୟ ପରିସ୍ଥିତିରେ କାମ କରିବାକୁ ଯାଇ ଛାତରୁ ପଡି ଚାଲିଗଲା ଯୁବକର ଜୀବନ l ଭଉଣୀର ବାହାଘର କରଜ ମୁଣ୍ଡରେ ଥିବାବେଳେ ପରିବାର ଉପରୁ ଉଧାରି ବୋଝ ହାଲୁକା କରିବା ପାଇଁ ଦାଦନ ଖଟିବାକୁ ଯାଇ ଆଉ ଘରକୁ ଫେରି ପାରିନଥିଲେ ଯୁବକ I ଏହିପରି ଏକ ଦୁଃଖଦ ଘଟଣା ଦେଖାଦେଇଛି ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ସ୍ଥିତ ହିଲୁଙ୍ଗ ଗ୍ରାମରେ I ପ୍ରକାଶ ଯେ ଏହି ଗ୍ରାମର ହୀରାମଣି ମେଣ୍ଡେଲୀ ର 22 ବର୍ଷିୟ ପୁଅ ବୁଦ୍ଧଦେବ ପରିସ୍ଥିତିରେ ପଡି ଦାଦନ ଶ୍ରମିକ ଭାବେ କାମ କରିବାକୁ ମହାରାଷ୍ଟ୍ରର ପୁଣେ କୁ ଯାଇଥିଲେ l ସେଠାରେ ଗତ 1 ତାରିଖରେ କାମ କରିବା ସମୟରେ ଛାତରୁ ତଳେ ଖସିପଡି ଯାଇଥିବା ବେଳେ ତାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଇଥିଲା I ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା l ଖବର ପାଇ ପରିବାର ଲୋକ ଗୁରୁବାର ସେଠାରେ ପହଁଞ୍ଚିବା ପରେ ଶବ ବ୍ୟବଚ୍ଛେଦ କରାଯାଇଥିଲା l ମୃତକଙ୍କ ବାପା ଓ ବଡ଼ ଭାଇ ଙ୍କ ଉପସ୍ଥିତିରେ ସଂସ୍କାର କରାଯାଇଥିଲା l ରୋଜଗାରିଆ ପୁଅ କୁ ହରାଇ ପରିବାର ବର୍ଗ ଦୁଃଖରେ ଭାଙ୍ଗି ପଡିଛନ୍ତି I ଦୁଃଖଦ ଖବର ଜଣାପଡିବା ପରେ ଆଖାପାଖ ଗ୍ରାମରେ ଶୋକର ଛାୟା ଖେଳିଯାଇଛି l