ଓଡ଼ିଶା ଡଟ୍ ନ୍ୟୁଜ୍

3/10/2024 at 12:54 PM

ନୂଆପଡ଼ା: ଏକୁଟିଆ ଥିବାର ସୁଯୋଗ ନେଇ ଜଣେ ମହିଳାଙ୍କ ବେକରୁ ସୁନା ଚେନ୍ ଲୁଟି ନେଲେ କିନ୍ନର । ବଡ଼ ବୋହୂ ପ୍ରତି ଗ୍ରହଙ୍କ ଅଶୁଭ ଦୃଷ୍ଟି ପଡ଼ିଛି । ଝଡ଼ାଫୁଙ୍କା କଲେ ଶୁଭ ଫଳ ମିଳିବ । ବୋହୂର ଦେହ ଭଲ ହୋଇଯିବ । ଏଭଳି ପ୍ରବର୍ତ୍ତାଇ ବୋହୂ ଏକୁଟିଆ ଥିବା ସୁଯୋଗରେ ତା’ ବେକରୁ ସୁନା ଚେନ୍ ଲୁଟି ନେଲେ କିନ୍ନର । ଏପରି ଏକ ଅଭାବନୀୟ ଘଟଣା ନୂଆପଡ଼ା ଜିଲ୍ଲା ଖଡ଼ିଆଳ ବ୍ଲକର ତୁକଲା ଗାଁରେ ଘଟିଛି ।

ତୁକଲା ଗାଁର ବ୍ୟବସାୟୀ ରାଜ କୁମାର ଖେମକା ଏହି ଅଭିଯୋଗ ଆଣିଛନ୍ତି । ସେ ଅଭିଯୋଗ କରିଛନ୍ତି, ୩ରୁ ୪ ଜଣ କିନ୍ନର ଏକ ଧଳା କାରରେ ଆସିଥିଲେ ତାଙ୍କ ଘରକୁ । ଘରେ ଥିବା ମହିଳାମାନଙ୍କଠାରୁ ଭିକ୍ଷା ବି ମାଗିଥିଲେ । ଏଥିସହ ଘରେ ହେଉଥିବା ଅସୁବିଧା ସମ୍ପର୍କରେ ପଚାରି ବୁଝିଥିଲେ ।

ପରେ ରାଜକୁମାରଙ୍କ ପତ୍ନୀ କିନ୍ନରଙ୍କ ସହ ଆଲୋଚନା କରି ବଡ଼ ବୋହୂ ସୋନିଆଙ୍କ ଦେହ ଭଲ ରହୁ ନଥିବା କହିଥିଲେ । ପ୍ରତିକାର କଲେ ଦେହ ଭଲ ହୋଇଯିବ ବୋଲି କିନ୍ନରମାନେ କହିବା ପରେ ରାଜକୁମାରଙ୍କ ପରିବାର ଲୋକେ ରାଜି ହୋଇଥିଲେ ।

ଏହାପରେ କିନ୍ନରମାନେ ଗୋଟିଏ ଢାଳରେ ପାଣି ମାଗି ବୋହୂକୁ ଛାଡି ସମସ୍ତେ ଘର ଭିତରକୁ ଯିବାକୁ କହିଥିଲେ । ଏହି ସମୟରେ ବୋହୂ ପିନ୍ଧିଥିବା ସୁନା ଚେନକୁ ଛିଣ୍ଡାଇ କାରରେ ଚଢ଼ି ଦୁଇ କିନ୍ନର ଫେରାର ହୋଇ ଯାଇଥିବା ଅଭିଯୋଗ କରିଛନ୍ତି ରାଜ୍ କୁମାର । ଏ ସଂପର୍କରେ ପରିବାର ପକ୍ଷରୁ ଖଡ଼ିଆଳ ପୋଲିସରେ ଅଭିଯୋଗ କରିଥିବାବେଳେ CCTV ଫୁଟେଜ ଆଧାରରେ ପୋଲିସ ତଦନ୍ତ କରୁଥିବା ଜଣାପଡ଼ିଛି ।