ସନତ କୁମାର ପ୍ରାଧନୀ

31/10/2024 at 11:45 AM

କଳାହାଣ୍ଡି:୩୧/୧୦:
ଖବରଦାତା—ସନତ କୁମାର ପ୍ରଧାନୀ
ଭାରସାମ୍ୟ ହରାଇ ରାସ୍ତା କଡରେ ଥିବା ଗଛରେ ପିଟି ହେଲା ହୁଣ୍ଡାଇ କାର । ଏହି ଦୁର୍ଘଟଣାରେ ଜଣେ ଝିଅର ମୃତ୍ୟୁ ହେଇଥିବା ବେଳେ ଚାଳକ ଗୁରୁତର ଆହତ ହୋଇଛନ୍ତି । ମୃତକ ରାମପୁର ଜଗନ୍ନାଥ ମନ୍ଦିର ପଡ଼ାର ମାମୁନି ମାଝୀ(୨୦) ଓ ଗାଡ଼ି ଚାଳକ ସୁବ୍ରତ ଘିଭେଲା(୨୩) ବୋଲି ଜଣାପଡ଼ିଛି । କଳାହାଣ୍ଡି ଜିଲ୍ଲା ରାମପୁର ଥାନା ଅନ୍ତର୍ଗତ ରାମପୁର – ଭବାନୀପାଟଣା ରାସ୍ତା ଗୋବର ବାହାଲୀ ଜୋର୍ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ରାମପୁର ଜଗନ୍ନାଥ ମନ୍ଦିର ପଡ଼ାର ମାମୁନି ମାଝୀ ଓ ଗାଡ଼ି ଚାଳକ ସୁବ୍ରତ ଘିଭେଲା ଏକ ହୁଣ୍ଡାଇ କାରରେ ଭବାନୀପାଟଣା ପଟେ ଯାଉଥିଲେ । ଏହି ସମୟରେ ଗାଡ଼ିର ଡ୍ରାଇଭର ସୁବ୍ରତ ଅତ୍ୟନ୍ତ ଦ୍ରୁତ ଗତିରେ ଗାଡ଼ି ଚଳାଇଥିଲେ । ଫଳରେ ଗଡ଼ିଟି ଭାରସାମ୍ୟ ହରାଇ ରାସ୍ତା କଡରେ ଥିବା ଏକ ଗଛରେ ଜୋର୍‌ରେ ପିଟି ହୋଇଥିଲା । ଘଟଣା ସ୍ଥଳରେ ହିଁ ମାମୁନିର ମୃତ୍ୟୁ ହେଇଥିବା ବେଳେ ଗାଡ଼ିର ଚାଳକ ଗୁରୁତର ହୋଇଥିଲେ । ଏହା ଦେଖି ତୁରନ୍ତ ସ୍ଥାନୀୟଲୋକେ ରାମପୁର ପୋଲିସକୁ ଖବର ଦେବା ସହ ଚାଳକ ଏବଂ ମୃତ ଝିଅଟିକୁ ଗାଡ଼ିରୁ ଉଦ୍ଧାର କରିଥିଲେ । ମୃତ ଶରୀରକୁ ବାହାର କରିବାକୁ ଅନେକ ସମୟ ଲାଗିଥିଲା । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଗୁରୁତର ଚାଳକକୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଛି । ମୃତଦେହକୁ ଜବତ କରି ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ରଖା ଯାଇଛି । ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ଶବ ହସ୍ତାନ୍ତର କରାଯିବ ବୋଲି ଜଣାପଡିଛି । ରାମପୁର ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି ।