ଓଡ଼ିଶା ଡଟ୍ ନ୍ୟୁଜ୍

3/04/2025 at 3:22 PM

ବ୍ରହ୍ମପୁର: ଆଜିଠୁ ଆରମ୍ଭ ହୋଇଛି ବ୍ରହ୍ମପୁରର ପ୍ରସିଦ୍ଧ ମାଆ ବୁଢ଼ୀ ଠାକୁରାଣୀ ଯାତ୍ରା । ଦୁଇ ବର୍ଷକୁ ଥରେ ମାଆ ବାପଘରକୁ ଆସୁଥିବାରୁ ଉତ୍ସାହିତ ବ୍ରହ୍ମପୁରବାସୀ । ପ୍ରାୟ ଏକ ମାସ ଧରି ମାଆ ବାପ ଘରେ ରହି ପୂଜା ପାଇବେ । ଏଥିପାଇଁ ବଡ଼ବଜାରର ଦେଶୀ ବେହେରା ସାହି ଉତ୍ସବ ମୁଖର । ଆଜି ମାଆଙ୍କୁ ଡାକରା କରିବେ ବାପା ଦେଶୀ ବେହେରା ।

ମାଆଙ୍କ ଆଗମନ ନେଇ ଦେଶୀ ବେହେରାଙ୍କ ଘର ସମ୍ମୁଖରେ ତିଆରି ହୋଇଛି ଅସ୍ଥାୟୀ ପୀଠ । ୨୫ ଦିନ ଧରି ଆୟୋଜିତ ଯାତ୍ରାରେ ଲକ୍ଷାଧିକ ଭକ୍ତଙ୍କ ସମାଗମ ହେବ । ଯାତ୍ରା ସୁରୁଖୁରୁରେ ହେବା ନେଇ ସମସ୍ତ ବ୍ୟବସ୍ଥା କରିଛନ୍ତି ସ୍ଥାନୀୟ ବ୍ୟବସାୟୀ ।

ଯାତ୍ରା ସମୟରେ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡ଼ି କରାଯିବାକୁ ବ୍ୟାପକ ପଦକ୍ଷେପ ନିଆଯାଇଛି । ପାଣି, ଆଲୋକର ବ୍ୟବସ୍ଥା କରାଯିବା ସହ ଅଗ୍ନିଶମ ବିଭାଗ ପ୍ରସ୍ତୁତ ରହିଛନ୍ତି । ପରମ୍ପରା ଅନୁସାରେ ପ୍ରତି ଦୁଇ ବର୍ଷରେ ଥରେ ହୋଇଥାଏ ମାଆ ବୁଢ଼ୀ ଠାକୁରାଣୀଙ୍କ ଯାତ୍ରା । ଦୁଇବର୍ଷରେ ଥରେ ମାଆଙ୍କ ଏହି ଯାତ୍ରାକୁ ନେଇ ସତେ ଯେପରି ଅପେକ୍ଷା କରି ରହିଥାନ୍ତି ସହରବାସୀ ।