ସମ୍ବଲପୁରୀ ବସ୍ତ୍ରର ପ୍ରଚାର ପ୍ରସାର ସହିତ ପଦ୍ମପୁରରେ ବୁଣାକାର ମାନଙ୍କ ପାଇଁ ସ୍ଥାୟୀ କମ୍ପ୍ଲେକ୍ସ ନିର୍ମାଣ ପାଇଁ କେନ୍ଦ୍ର ହସ୍ତ ଓ ବୟନ ଶିଳ୍ପ ମନ୍ତ୍ରୀ ଙ୍କୁ ଦାବି ଜଣାଇଲେ ବରଗଡ଼ ସାଂସଦ
ସମ୍ବଲପୁର:ଓଡିଶାର ସମ୍ବଲପୁରୀ ବସ୍ତ୍ର ସାରା ଦେଶରେ ପ୍ରସିଦ୍ଧି ଲାଭ କରିଛି। ବିଶ୍ୱ ଦରବାରରେ ଏହି ବସ୍ତ୍ରର ଚାହିଦା ମଧ୍ୟ୍ୟ ଦିନକୁ ଦିନ ବଢ଼ିବାରେ ଲାଗିଛି।ସମ୍ବଲପୁରୀ ବସ୍ତ୍ର ଓ ହସ୍ତତନ୍ତକୁ ବଜାୟ ରଖିବା ପାଇଁ ବୁଣାକାର ମାନଙ୍କ ଲାଗି ବିଭିନ୍ନ ସୁବିଧା ସୁଯୋଗ କରାଯିବା ଆବଶ୍ୟକତା ଥିବାରୁ ଏହି ଗୁରୁତ୍ୱପୂର୍ଣ୍ଣ ବିଷୟକୁ ନେଇ କେନ୍ଦ୍ର ହସ୍ତତନ୍ତ୍ର ଓ ବୟନ ଶିଳ୍ପ ମନ୍ତ୍ରୀ ଗିରିରାଜ ସିଂଙ୍କ ସହ ବରଗଡ ସାଂସଦ ପ୍ରଦୀପ ପୁରୋହିତ ଆଲୋଚନା କରିଛନ୍ତି ।
ଏହି ଆଲୋଚନା କାଳରେ ପଦ୍ମପୁର ଠାରେ ବୁଣାକାରମାନଙ୍କ ପାଇଁ ଏକ ସ୍ଥାୟୀ କମ୍ପ୍ଲେକ୍ସ ନିର୍ମାଣ ପାଇଁ ସାଂସଦ ଗୁରୁତ୍ୱଦେଇ ଏହାର ପ୍ରତିଷ୍ଠା ପାଇଁ ମନ୍ତ୍ରୀ ଗିରିରାଜଙ୍କ ଦୃଷ୍ଟି ଆକର୍ଷଣ କରିଛନ୍ତି। ସମ୍ବଲପୁରୀ ବସ୍ତ୍ରର ପ୍ରଚାର ଓ ପ୍ରସାର ପାଇଁ ବିଭିନ୍ନ କାର୍ଯ୍ୟକ୍ରମ ହାତକୁ ନେବା ପାଇଁ ମଧ୍ୟ ସେ କେନ୍ଦ୍ରମନ୍ତ୍ରୀଙ୍କ ସହ ଆଲୋଚନା କରିଛନ୍ତି । ପୂର୍ବରୁ ପଦ୍ମପୁର ସ୍ଥିତ ମହୁଲପାଲି ବୁଣାକାର କେନ୍ଦ୍ରକୁ ନିକଟସ୍ଥ ସୋନପୁର, ସମ୍ବଲପୁର, ବରଗଡ ପରି ଅନ୍ୟ ଜିଲ୍ଲାର ବୁଣାକାର ମାନେ ବ୍ୟବସାୟ କରିବା ପାଇଁ ସପ୍ତାହକୁ ଥରେ ଆସୁଥିଲେ । କିନ୍ତୁ ପରବର୍ତ୍ତୀ ସମୟରେ ସେହି କେନ୍ଦ୍ର ବର୍ତ୍ତମାନ ବନ୍ଦ ହେବା ଅବସ୍ଥାରେ ରହିଛି। ତେଣୁ ବୁଣାକାର ଓ ବ୍ୟବସାୟୀଙ୍କ ସ୍ଥାୟୀ ବ୍ୟବସ୍ଥା କରାଯିବା ନେଇ ବରଗଡ ସାଂସଦ କେନ୍ଦ୍ର ହସ୍ତତନ୍ତ୍ର ଓ ବୟନ ଶିଳ୍ପ ମନ୍ତ୍ରୀ ଗିରିରାଜ ସିଂଙ୍କ ଠାରେ ବିଶେଷ ଆଲୋଚନା କରି ସମ୍ବଲପୁରୀ ବସ୍ତ୍ର କୁ ଅଧିକ ସର୍ବବିଦିତ କରିବା ପାଇଁ ଆଲୋଚନା କରିବା ସହିତ ଯୋଜନା ଭିତ୍ତିକ ପତ୍ର ପ୍ରଦାନ କରିଛନ୍ତି।
