ଜମନକିରା ଡାକ୍ତରଖାନା ବିଭିନ୍ନ ସମସ୍ୟା…. ଜିଲ୍ଲାପାଳଙ୍କ ନିର୍ଦ୍ଦେଶକୁ କର୍ତ୍ତୃପକ୍ଷଙ୍କ ବେଖାତିର; ୧୫ଦିନ ପରେ ବି କାର୍ଯ୍ୟ ତ୍ବରାନ୍ବିତ ପାଇଁ ନାହିଁ ଆଗ୍ରହ…
ଜମନକିରା : ଜମନକିରା ବ୍ଲକ ସଦର ମହକୁମା ସ୍ଥିତ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରକୁ ଗତ ୬ତାରିଖ ଦିନ ଜିଲ୍ଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର ପରିଦର୍ଶନ କରି ଡାକ୍ତରଖାନା ର ବିଭିନ୍ନ ସମସ୍ୟା ଉପରେ ଆଲୋଚନା କରିଥିଲେ। ଏବଂ ଡାକ୍ତରଖାନା ର ମରାମତି ଏବଂ ଉନ୍ନତି କରଣ ନେଇ ଗ୍ରାମ୍ୟ ଉନ୍ନୟନ ସଂସ୍ଥା ମୁଖ୍ୟ ପରିଚାଳନା ଅଧିକାରୀ, ସିଡିଏମଓ, ସ୍ବାସ୍ଥ୍ୟ ବିଭାଗ ଜିଲ୍ଲା ପ୍ରଶାସନିକ ଅଧିକାରୀ, ବିଡ଼ିଓ, ସୂପରିଟେଣ୍ଡାଣ୍ଟ ଏବଂ ମେଡିକାଲ ଅଫିସର ଙ୍କୁ ନିର୍ଦ୍ଦେଶ କରିଥଲେ। ମାତ୍ର ଜିଲ୍ଲାପାଳଙ୍କ ନିର୍ଦ୍ଦେଶ ସତ୍ବେ ପ୍ରଶାସନିକ ଅଧିକାରୀ ଏବଂ ବିଭାଗ କର୍ତ୍ତୃପକ୍ଷ ନିର୍ଦ୍ଦେଶକୁ ବେଖାତିର୍ କଲା ଭଳିଆ ଲୋକେ ଅନୁଭବ କରୁଛନ୍ତି। ଅଦ୍ୟାବଧି କୌଣସି କାର୍ଯ୍ୟ ର ଶୁଭାରମ୍ଭ ହୋଇପାରିନାହିଁ।
ସୂଚନା ଯୋଗ୍ୟ ଯେ, ଜମନକିରା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ଟି ୧୯୬୦ ମସିହାରେ ନିର୍ମାଣ କରାଯାଇଥିଲା। ଦୀର୍ଘ ୬୫ ବର୍ଷ ଅତିବାହିତ ହୋଇ ଯାଇଥିଲେ ମଧ୍ୟ ସେହି ପୁରୁଣା କୋଠାରେ ବହିର୍ବିଭାଗ କାର୍ଯ୍ୟ ଚାଲୁ ରହିଛି। ଅନେକ ଥର ଉକ୍ତ କୋଠା କୁ ମରାମତି କରାଯାଇ ଥିବା ସତ୍ତ୍ୱେ କୋଠା ଟି ବିପଦ ସଙ୍କୁଳ ଅବସ୍ଥାରେ ରହିଛି। ଅଳ୍ପ ବର୍ଷା ହେଲେ ପାଣି ଛାତରୁ ଗଲୁଛି। ବିଦ୍ୟୁତ ନଥିବା ବେଳେ ଅନ୍ଧାରରେ ଡାକ୍ତରଖାନା ର ସମସ୍ତ କାର୍ଯ୍ୟ କରାଯାଉଛି। ପ୍ରସୂତି କାଳୀନ ଜରୁରୀ ସ୍ଥିତିରେ ଅପରେସନ ମଧ୍ୟ ଅନ୍ଧାରରେ କରାଯାଉଛି। ଅକସ୍ମାତ ଦୁର୍ଘଟଣା ସମୟରେ ଅନ୍ଧାରରେ ଆଶୁ ଚିକିତ୍ସା କରିବା ଡାକ୍ତର ଏବଂ ସ୍ବାସ୍ଥ୍ୟ କେନ୍ଦ୍ରର କର୍ମଚାରୀଙ୍କ ପାଇଁ ନାହିଁ ନଥିବା ଅସୁବିଧାର ସମ୍ମୁଖିନ ହେବାକୁ ପଡୁଛି। ସୋଲାର ଲାଇଟ୍ ସିଷ୍ଟମ୍ ଟି ସମ୍ପୂର୍ଣ ଅକାମୀ ହୋଇ ପଡ଼ିଛି। ବାରମ୍ବାର ଅଭିଯୋଗ କରାଯାଇଥିବା ସତ୍ତ୍ୱେ ପ୍ରତିକାର କରାଯାଉନାହିଁ। ଔଷଧ ବିତରଣ ପାଇଁ ଫାର୍ମାସୀ ଅଫିସର ଙ୍କ ପାଇଁ ଭଲ କୋଠରୀ ଟେ ନାହିଁ। ଲାବୋଟରୀ ଗୃହ କଥା ନକହିବା ଭଲ। ୩୦ ବର୍ଗ ବିଶିଷ୍ଟ ଏକ ରୋଷେଇ ଘରେ କୋଠରୀରେ ଲାବୋଟାରି କରାଯାଇଥିବାରୁ ଆନୁସାଙ୍ଗିକ ସାମଗ୍ରୀ ଗୁଡିକ ରଖିବା ପାଇଁ ଜାଗା ଅଣ୍ଟୁନି। ରୋଗୀ କୁ ବସେଇ ରକ୍ତ ସଂଗ୍ରହ କରିବାରେ ବହୁ ଅସୁବିଧା ହେଉଛି। ଯନ୍ତ୍ରାଂଶ ମଧ୍ୟ ଖରାପ ହୋଇ ଯାଉଛି।ଅନ୍ୟ ପକ୍ଷରେ ପାଣି ଗଳି ସନ୍ତସନ୍ତିଆ ହେଉଛି। ଏଭଳି ସ୍ଥିତିରେ ରୋଗୀର ନମୁନା ପରୀକ୍ଷା କରିବା ସମସ୍ୟା ଉପୁଜିଛି। ସ୍ବାସ୍ଥ୍ୟ କେନ୍ଦ୍ରରେ ଅତି କମରେ ୬ ଟି ବେଡ ରହିବା କଥା କନ୍ତୁ କୋଠରୀ ଅସୁବିଧା ଯୋଗୁଁ ମାତ୍ର ୪ଟି ବେଡ ପଡ଼ି ପାରୁଛି। ଅନ୍ୟ ପଟେ ଶୌଚାଳୟ ଓ ପାଇଖାନା ଅବସ୍ଥା ଅତି ଖରାପ। ନାଳି ଗୁଡାକ ପୁରା ଜାମ ହୋଇ ରହିଥିବା ରୁ ବ୍ୟବହାର ଯୋଗ୍ୟ ହୋଇ ପାରୁନାହିଁ। ରୋଗୀ ମାନେ ବଡ କଷ୍ଟରେ ରହିଥାନ୍ତି। ଡାକ୍ତରଖାନା ଟି ୬୫ ବର୍ଷରୁ ଅଧିକ ହୋଇ ଯାଇଥିବା ସତ୍ବେ କର୍ତ୍ତୃପକ୍ଷଙ୍କ ଆନ୍ତରିକତା ର ଅଭାବ ଯୋଗୁଁ ଅଦ୍ୟାବଧି ବାଉଣ୍ଡ୍ରୀ ଚାରିପଟେ ଦିଆଯାଇ ପାରିନାହିଁ। ଯଦ୍ୱାରା ଅସାମାଜିକ ତତ୍ୱଙ୍କ ଯାତାୟାତ ଅକ୍ଲେଶରେ ହୋଇପାରୁଛି। ଡାକ୍ତରଖାନା ପରିସରରେ ରହୁଥିବା ସ୍ବାସ୍ଥ୍ୟ କର୍ମୀ ମାନେ ନିଜ କୁ ଏବଂ ନିଜ ପରିବାର ବର୍ଗଙ୍କୁ ସୁରକ୍ଷିତ ମଣୁ ନାହାନ୍ତି। ଏସବୁ ଆଦି ସମସ୍ୟା ଜାଣିବା ପରେ ଜିଲ୍ଲାପାଳ ପୁରୁଣା କୋଠା ଉପରେ ଟିଣ ଛାତ, ଔଷଧ ବିତରଣ ପାଇଁ ଏକ ସ୍ବତନ୍ତ୍ର ଗୃହ, ଲାବୋରେଟରୀ ପାଇଁ ଉତ୍ତମ ସ୍ଥାନରେ କୋଠରୀ, ଗୋଟିଏ କୋଠରୀରେ ୬ ଗୋଟି ବେଡ ରହି ପାରିବ ସେଭଳି କୋଠରୀ କୁ ଉନ୍ନତିକରଣ, ଡାକ୍ତରଖାନା ପରିସର କୁ ସର ଜମିନ ତଦନ୍ତ କରାଯାଇ ବାଉଣ୍ଡରୀ ନିର୍ମାଣ କରିବା, ପରିସର ରେ ଉଦ୍ୟାନ କରି ଆଲୋକ ମାଳା ର ବ୍ୟବସ୍ଥା କରିବା, ଛାତ ଉପରେ ଟିଣ ଛାତ କରିବା ଆଦି ସମସ୍ୟା ସମାଧାନ ଦିଗରେ ଜିଲ୍ଲାପାଳ ବିଭାଗୀୟ ଅଧିକାରୀ ଶୀଘ୍ର କାମ ଆରମ୍ଭ କରିବା ପାଇଁ ନିର୍ଦ୍ଦେଶ କରିଥଲେ। ମାତ୍ର ଜିଲ୍ଲାପାଳଙ୍କ ନିର୍ଦ୍ଦେଶ ର ୧୫ ଦିନ ବିତି ଯାଇଥିଲେ ସୁଦ୍ଧା ଅଦ୍ୟାବଧି କୌଣସି କାର୍ଯ୍ୟ ଆରମ୍ଭ ହୋଇ ପାରିନାହିଁ।
ଏସଂକ୍ରାନ୍ତରେ ଫାଶିମମାଲ ଉନ୍ନୀତ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ସୁପରିଟେଣ୍ଡଣ୍ଟ ଡ.ହରିଶ୍ଚନ୍ଦ୍ର ବାଘ ଏବଂ ଜମନକିରା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରର ଡ. ସୁରଜ କୁମାର ପଟେଲ ପ୍ରମୁଖଙ୍କୁ ଯୋଗାଯୋଗ କରି ପଚାରିବାରୁ ଆସନ୍ତା ଦିନେ ଦି ଦିନ ମଧ୍ୟରେ କାର୍ଯ୍ୟ ଆରମ୍ଭ କରାଯିବ ବୋଲି କହିଥିଲେ।
