ଠିକଣା ପଚାରିବାରୁ ଡେଲିଭରି ବୟଙ୍କୁ ଛୁରୀମାଡ଼: ଅଭିଯୁକ୍ତ ଗିରଫ, କୋର୍ଟ ଚାଲାଣ ।
ବଲାଙ୍ଗୀର,୧୫।୬: କେବଳ ଠିକଣା ପଚାରିବା ଯେ ଜଣଙ୍କ ପାଇଁ ଏତେ ମହଙ୍ଗା ପଡ଼ିବ, ତାହା କେହି କଳ୍ପନା କରିନଥିଲେ। ବଲାଙ୍ଗୀର ଜିଲ୍ଲା ଖପ୍ରାଖୋଲ ଥାନା ଅନ୍ତର୍ଗତ ଝାଙ୍କରପାଲି ଗ୍ରାମରେ ଆଜି ସୋମବାର ପୂର୍ବାହ୍ନରେ ଏଭଳି ଏକ ଅଭାବନୀୟ ଓ ସାଂଘାତିକ ଘଟଣା ସାମ୍ନାକୁ ଆସିଛି। ଜଣେ ଗ୍ରାହକଙ୍କ ଠିକଣା ପଚାରିବାରୁ ଜଣେ କୋରିଅର ଡେଲିଭରି ବୟଙ୍କୁ ଧାରୁଆ ଛୁରୀରେ ମରଣାନ୍ତକ ଆକ୍ରମଣ କରାଯାଇଛି। ପୁଲିସ ଏହି ଘଟଣାରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି।
ସୂଚନା ଅନୁଯାୟୀ, ଭାଲୁଡୁଙ୍ଗରି ଗ୍ରାମର ଯୁବକ ପିଣ୍ଟୁ ସାହୁ ଖପ୍ରାଖୋଲସ୍ଥିତ ଏକ ଘରୋଇ କୋରିଅର କମ୍ପାନୀରେ ଡେଲିଭରି ବୟ ଭାବେ କାର୍ଯ୍ୟ କରନ୍ତି। ଆଜି ସୋମବାର ପୂର୍ବାହ୍ନ ପ୍ରାୟ ୧୦ଟା ସମୟରେ ସେ ଏକ ପାର୍ସଲ ଡେଲିଭରି କରିବା ପାଇଁ ଭାନପୁର ପଞ୍ଚାୟତର ଝାଙ୍କରପାଲି ଗ୍ରାମକୁ ଯାଇଥିଲେ। ପାର୍ସଲରେ ଥିବା ନିର୍ଦ୍ଦିଷ୍ଟ ଠିକଣା ପାଇବାରେ ଅସୁବିଧା ହେବାରୁ, ସେ ସେହି ଗ୍ରାମର ପ୍ରକାଶ ସିଂ ବରିହା (ପୁଟେଲ) ନାମକ ଜଣେ ଯୁବକଙ୍କୁ ରାସ୍ତା ବା ଘର ବିଷୟରେ ପଚାରିଥିଲେ।
ଠିକଣା ପଚାରିବା ମାତ୍ରେ ପ୍ରକାଶ ହଠାତ୍ ଉତ୍ତେଜିତ ହୋଇପଡ଼ିଥିଲେ। କିଛି ବୁଝିବା ସୁଝିବା ପୂର୍ବରୁ ସେ ଏକ ଧାରୁଆ ଚାକୁ ବାହାର କରି ପିଣ୍ଟୁଙ୍କ ପଛପଟୁ ବର୍ବର ଭାବେ ଆକ୍ରମଣ କରିଥିଲେ।
ଏହି ଜଘନ୍ୟ ଛୁରୀମାଡ଼ରେ ପିଣ୍ଟୁ ଗୁରୁତର ଭାବେ ଆହତ ହୋଇ ରକ୍ତାକ୍ତ ହୋଇପଡ଼ିଥିଲେ। ତେବେ ସେଠାରେ ଅଧିକ ସମୟ ନରହି ସେ ଜୀବନ ବିକଳରେ ରକ୍ତାକ୍ତ ଅବସ୍ଥାରେ ସେଠାରୁ ଖସି ପଳାଇ ଆସିଥିଲେ ଏବଂ ସିଧାସଳଖ ଖପ୍ରାଖୋଲ ଥାନାରେ ପହଞ୍ଚି ଘଟଣା ସମ୍ପର୍କରେ ଏକ ଲିଖିତ ଅଭିଯୋଗ ଦାଖଲ କରିଥିଲେ।
ଅଭିଯୋଗକୁ ଗମ୍ଭୀରତାର ସହ ନେଇ ଖପ୍ରାଖୋଲ ପୋଲିସ କେସ୍ ନଂ ୧୨୨/୨୦୨୬ ରେ ଏକ ମାମଲା ରୁଜୁ କରିଥିଲା। ଥାନା ଅଧିକାରୀଙ୍କ ନିର୍ଦ୍ଦେଶକ୍ରମେ ଏକ ସ୍ୱତନ୍ତ୍ର ଟିମ୍ ତୁରନ୍ତ ଝାଙ୍କରପାଲି ଗ୍ରାମରେ ଚଢ଼ାଉ କରି ଅଭିଯୁକ୍ତ ପ୍ରକାଶ ପୁଟେଲଙ୍କୁ କାବୁ କରିଥିଲେ।
ଥାନାରେ ଆଣି ଅଭିଯୁକ୍ତଙ୍କୁ ପଚରାଉଚରା କରାଯିବା ପରେ ଆଜି ତାଙ୍କୁ କୋର୍ଟ ଚାଲାଣ କରାଯାଇଛି। ଦିନ ଦିପହରରେ ଜଣେ କର୍ତ୍ତବ୍ୟରତ କର୍ମଚାରୀଙ୍କ ଉପରେ ଏଭଳି ସାଂଘାତିକ ଆକ୍ରମଣକୁ ନେଇ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।
