ବିଏମ୍ସି-ବିଡିଏର ସବୁଜ ପଦକ୍ଷେପ: ଜନପଥରେ ଯାତ୍ରୀଙ୍କ ସୁବିଧା ପାଇଁ ନୂଆ ଟ୍ରାଫିକ୍ ଆଶ୍ରୟସ୍ଥଳ
ଭୁବନେଶ୍ୱର: ଯାତ୍ରୀଙ୍କ ସୁବିଧା ବୃଦ୍ଧି ଏବଂ ସହରର ସୌନ୍ଦର୍ଯ୍ୟକରଣ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ ଭୁବନେଶ୍ୱର ମହାନଗର ନିଗମ (ବିଏମ୍ସି) ଓ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ଜନପଥ କରିଡର୍ର ପ୍ରମୁଖ ସ୍ଥାନଗୁଡ଼ିକରେ ଆଧୁନିକ ଟ୍ରାଫିକ୍ ଏବଂ ପାର୍କିଂ-ସହ-ଯାତ୍ରୀ ଆଶ୍ରୟସ୍ଥଳ (ସେଡ୍) ନିର୍ମାଣ ପାଇଁ ଏକ ପାଇଲଟ୍ ପ୍ରକଳ୍ପ ଆରମ୍ଭ କରିଛନ୍ତି।
ଏହି ପଦକ୍ଷେପର ଲକ୍ଷ୍ୟ ହେଉଛି ଯାତ୍ରୀମାନଙ୍କୁ ଉନ୍ନତ ସୁବିଧା ଯୋଗାଇବା ସହିତ ରାସ୍ତାଘାଟର ପରିବେଶକୁ ଅଧିକ ସବୁଜ ଓ ଆକର୍ଷଣୀୟ କରିବ। ସମସ୍ତ ସମ୍ପୃକ୍ତ ଅଂଶୀଦାରଙ୍କ ସକ୍ରିୟ ଅଂଶଗ୍ରହଣ ମାଧ୍ୟମରେ ସହରଗୁଡ଼ିକରେ ବାୟୁର ଗୁଣବତ୍ତା ଉନ୍ନତ କରିବା ଲକ୍ଷ୍ୟ ନେଇ ‘ଜାତୀୟ ସ୍ୱଚ୍ଛ ବାୟୁ କାର୍ଯ୍ୟକ୍ରମ’ (ଏନ୍ସିଏପି) ଅଧୀନରେ ଏହି ପ୍ରକଳ୍ପ କାର୍ଯ୍ୟକାରୀ କରାଯାଉଛି।
ସହରର ଦୁଇଟି ବ୍ୟସ୍ତବହୁଳ ଅଞ୍ଚଳ ରୂପାଲୀ ଛକ ଓ ପାୱାର ହାଉସ୍ ଛକ ନୂତନ ଟ୍ରାଫିକ୍ ସେଡ୍ (ଆଶ୍ରୟସ୍ଥଳ) ନିର୍ମାଣ କାର୍ଯ୍ୟ ଚାଲିଛି। ପ୍ରକଳ୍ପର ଅଂଶବିଶେଷ ଭାବେ ଏହି ଦୁଇଟି ଗୁରୁତ୍ୱପୂର୍ଣ୍ଣ ସ୍ଥାନରେ ଯାତ୍ରୀଙ୍କ ସୁବିଧା ପାଇଁ ଆଧୁନିକ ଟ୍ରାଫିକ୍ ସେଡ୍ ତିଆରି କରାଯାଉଛି। ଏହା ବ୍ୟତୀତ ଜନପଥ କରିଡର୍ର ଗୁରୁତ୍ୱପୂର୍ଣ୍ଣ ସ୍ଥାନମାନଙ୍କରେ ଚାରୋଟି ପାର୍କିଂ-କମ୍-ଯାତ୍ରୀ ଆଶ୍ରୟସ୍ଥଳ ନିର୍ମାଣ କରାଯାଉଛି। ପଥଚାରୀ, ଯାତ୍ରୀ ଓ ଗାଡ଼ି ଚାଳକଙ୍କ ଆବଶ୍ୟକତାକୁ ଧ୍ୟାନରେ ରଖି ଏହି ବ୍ୟବସ୍ଥା କରାଯାଉଥିବା ଜଣାପଡ଼ିଛି। ଏହି ପଦକ୍ଷେପ ସହରର ଟ୍ରାଫିକ୍ ବ୍ୟବସ୍ଥାକୁ ସୁଦୃଢ଼ କରିବା ସହ ଯାତ୍ରୀଙ୍କୁ ଅଧିକ ସୁବିଧା ପ୍ରଦାନ କରିବ ବୋଲି ଆଶା କରାଯାଉଛି।
ବିଏମସି କମିଶନର ଏବଂ ବିଡିଏ ଉପାଧ୍ୟକ୍ଷ ଚଞ୍ଚଳ ରାଣା କହିଛନ୍ତି ଯେ ସେଡ୍ଗୁଡ଼ିକରେ ଏକ ସମସାମୟିକ ଡିଜାଇନ୍ ତିଆରି ହୋଇଛି। ଯେଉଁଥିରେ ସୌନ୍ଦର୍ଯ୍ୟ ଏବଂ ସ୍ଥାୟୀତ୍ୱର ସମନ୍ୱୟ ରହିବ। ଏହାର ଏକ ପ୍ରମୁଖ ବିଶେଷତ୍ୱ ହେଉଛି ଫ୍ୟାବ୍ରିକ୍ କ୍ୟାନୋପି ଉପରେ ଫ୍ଲେମ୍ ଭାଇନ୍ କ୍ରିପର୍ର ବ୍ୟବହାର। ଏହା ଧୀରେ ଧୀରେ ଏକ ପ୍ରାକୃତିକ ସବୁଜ ଆଚ୍ଛାଦନ ସୃଷ୍ଟି କରିବ। ଏହି ପରିବେଶ-ଅନୁକୂଳ ବ୍ୟବସ୍ଥା ଖରା ଦିନେ ତାପ ଶୋଷଣକୁ କମାଇବା ସହିତ ଟ୍ରାଫିକ୍ ଜଙ୍କସନ୍ କିମ୍ବା ପାର୍କିଂ ସ୍ଥାନରେ ଅପେକ୍ଷା କରୁଥିବା ଲୋକଙ୍କ ପାଇଁ ଏକ ଶୀତଳ ଓ ଆରାମଦାୟକ ପରିବେଶ ସୃଷ୍ଟି କରିବ ବୋଲି ବିଶ୍ୱାସ କରାଯାଉଛି।
ଟ୍ରାଫିକ୍ ଆଶ୍ରୟସ୍ଥଳଗୁଡ଼ିକରେ ସ୍ତମ୍ଭ ମଧ୍ୟରେ ବିଶେଷ ଡିଜାଇନ୍ର ଭୂସମାନ୍ତର ସ୍କ୍ରିନ୍ ପ୍ୟାନେଲ୍ ଲଗାଯାଇଛି। ଏହା ଦିନସାରା ବିଭିନ୍ନ କୋଣରୁ ଆସୁଥିବା ସିଧାସଳଖ ସୂର୍ଯ୍ୟକିରଣକୁ ଅଟକାଇ କଠୋର ପାଗରୁ ଅଧିକ ସୁରକ୍ଷା ଦେବ। ଏହା ସହିତ ପାର୍କିଂ-କମ୍-କମ୍ୟୁଟର ସେଡ୍ଗୁଡ଼ିକ ମଧ୍ୟ ତିଆରି କରାଯାଇଛି। ଏଗୁଡ଼ିକ ଯାତ୍ରୀ ଓ ପାର୍କିଂ ହୋଇଥିବା ଗାଡ଼ିକୁ ବର୍ଷା ଓ ଅତ୍ୟଧିକ ଗରମରୁ ରକ୍ଷା କରିବ। ଏହି ସେଡ୍ଗୁଡ଼ିକ ସୁବିଧାଜନକ ଅପେକ୍ଷା ସ୍ଥାନ ଭାବେ ବ୍ୟବହାର ହେବ। ବିଶେଷ କରି ବୟସ୍କ ଲୋକ, ଗର୍ଭବତୀ ମହିଳା ଓ ଅନ୍ୟ ଦୁର୍ବଳ ଯାତ୍ରୀମାନେ ଏଥିରୁ ଅଧିକ ଲାଭବାନ୍ ହେବେ।
ସହରରେ ଜଳବାୟୁ-ଅନୁକୂଳ ସହରୀ ଭିତ୍ତିଭୂମି ଉପରେ ଗୁରୁତ୍ୱ ଦେଇ ଏକ ପାଇଲଟ୍ ପ୍ରକଳ୍ପ ଆରମ୍ଭ ହୋଇଛି। ଯାହା ଜନସାଧାରଣଙ୍କ ସୁବିଧା ଓ ନିରନ୍ତର ବିକାଶକୁ ପ୍ରାଥମିକତା ଦେଉଛି। ସେହିପରି ‘ସ୍ମାର୍ଟ ଜନପଥ’ କରିଡରର ଚାଲିଥିବା ୫.୮ କିଲୋମିଟର ଲମ୍ବା ସୌନ୍ଦର୍ଯ୍ୟକରଣ ଓ ଲ୍ୟାଣ୍ଡସ୍କେପିଂ କାର୍ଯ୍ୟକୁ ଏହା ପୂର୍ଣ୍ଣ କରିବା ସହ ସହରରେ ଅଧିକ ସବୁଜ, ପଥଚାରୀ-ଅନୁକୂଳ ଓ ନାଗରିକ-କେନ୍ଦ୍ରିକ ସାର୍ବଜନୀନ ସ୍ଥାନ ତିଆରି କରିବାର ଲକ୍ଷ୍ୟକୁ ମଧ୍ୟ ଏହା ମଜବୁତ କରିବ।
