ମହେନ୍ଦ୍ର କୁମାର ସାଇ18/10/2023 at 5:50 AM
ଝାରସୁଗୁଡା ୧୭/୧୦ (ଓଡ଼ିଶା ନ୍ୟୁଜ) ଝାରସୁଗୁଡା ଜିଲ୍ଲା ବେଳପାହାଡ଼ ବନାଞ୍ଚଳ ଅଧିନସ୍ଥ ଭିକମପାଲି ଫରେଷ୍ଟ ସେକ୍ସନ ବାସେନପାଲି ଛକରେ ଅଜଣା ଭାରିଯାନ ଧକ୍କାରେ ଗୁରୁତର ଆହତ ହୋଇଥିବା ଏକ ଜଙ୍ଗଲୀ ବାରହା ମୃତ୍ୟୁ ବରଣ କରିଛି ।
ସୂଚନା ଅନୁଯାୟ ଏନଏଚ ୪୯ ଭିକମପାଲି ବାସେନପାଲି(ଖ) ଛକରେ ସୋମବାର ବିଳମ୍ବିତ ରାତିରେ ଏକ ଜଙ୍ଗଲୀ ବାରହା ରାସ୍ତା ପାରି ହେଉଥିବା ବେଳେ ଏକ ଅଜଣା ଭାରିଯାନ ଧକ୍କା ମାରିଥିଲା । ଫଳରେ ଉକ୍ତ ବାରହା ର ଅଣ୍ଟା ଭାଙ୍ଗିଯାଇ ଗୁରୁତର ଆହତ ହୋଇଥିଲା । ଏ ସମ୍ପର୍କରେ ସ୍ଥାନୀୟ ଲୋକେ ବନ ବିଭାଗ କୁ ଖବର ଦେଇଥିଲେ । ଘଟଣା ସ୍ଥଳରେ ଠିକ ସମୟରେ ବନ କର୍ମଚାରୀ ମାନେ ପହଞ୍ଚି ଥିଲେ । କିନ୍ତୁ ବେଳପାହାଡ଼ ବନାଞ୍ଚଳ ଅଧିକାରୀ ଶର୍ମିଳା ନାୟକ ଏବଂ ଉଦ୍ଧାର କାରୀ ଦଳ ଆଜି ଦିନ ପ୍ରାୟ ୧୧ ଟା ସମୟରେ ଆସିଥିଲେ ମଧ୍ୟ ଉକ୍ତ ଜଙ୍ଗଲୀ ବାରହାକୁ ଜୀବିତ ଅବସ୍ଥାରେ ଉଦ୍ଧାର କରି ପାରିନଥିଲେ । ସେମାନଙ୍କ ପହଞ୍ଚିବା କ୍ଷଣି ତାର ଜୀବନ ଚାଲି ଯାଇଥିଲା । ଯଦି ସେମାନେ ଠିକ ସମୟରେ ଆସି ଗୁରୁତର ଆହତ ବାରହାକୁ ଉଦ୍ଧାର କରି ଉପଯୁକ୍ତ ଚିକିତ୍ସା କରିଥାନ୍ତେ ତାହେଲେ ତାର ଜୀବନ ବଞ୍ଚି ଯାଇଥାନ୍ତା ବୋଲି ସ୍ଥାନୀୟ ଲୋକେ ପ୍ରକାଶ କରିଛନ୍ତି । ଏହା ପରେ ମୃତ ବାରହାକୁ କନକତୋରା ନେଇ ପ୍ରାଣୀ ଚିକିତ୍ସକଙ୍କ ଦ୍ୱାରା ଶବ ବ୍ୟବଚ୍ଛେଦ କରା ଯାଇଥିବା ଜଣା ପଡ଼ିଛି ।