ଓଡ଼ିଶା ଡଟ୍ ନ୍ୟୁଜ୍3/08/2024 at 11:48 AM
ବାଲେଶ୍ବର: ବାଲେଶ୍ୱର ଜଳସେଚନ ଡିଭିଜନର ଅଧୀକ୍ଷଣ ଯନ୍ତ୍ରୀ (SE) ପ୍ରଭାସ କୁମାର ପ୍ରଧାନଙ୍କୁ ଭାଗ୍ୟ ଖରାପ । ଯନ୍ତ୍ରୀ ମହାଶୟ ଯେଉଁ ପଦବୀରେ ଥିଲେ ତାକୁ ଭରପୂର କାମରେ ଲଗାଇଛନ୍ତି । ବାବୁ ଏମିତି ରାମ୍ପିଛନ୍ତି ଯେ, କିଛି ବି ଛାଡି ନାହାନ୍ତି । ଆଉ ରାମ୍ପି ରାମ୍ପି ୮୫ଟି ପ୍ଲଟ କିଣି ପକାଇଛନ୍ତି । ହେଲେ ବାବୁଙ୍କ ଉପରେ ଏବେ ଶନିଦେବଙ୍କ କୋପ ବୋଧେ ପଡ଼ିଛି । ନହୋଇଥିଲେ ପଦୋନ୍ନତି ପାଇବାର ଦିନକ ପରେ କ’ଣ ଭିଜିଲାନ୍ସ ମାଡ଼ି ବସିଥାନ୍ତି । ମହାଶୟଙ୍କୁ ଗୁରୁବାର ଦିନ ପଦୋନ୍ନତି ମିଳିଥିଲା । ଆଉ ଶୁକ୍ରବାର, ଭିଜିଲାନ୍ସ ବାବୁମାନେ ଖାତା, କଲମ ଧରି ହାଜର ହୋଇଗଲେ । ଯନ୍ତ୍ରୀ ମହାଶୟଙ୍କ ୭ଟି ଠକଣାରେ ଏକାବେଳେ ହେଲା ରେଡ । ଆଉ ଯେତିକି ବାହାରିଲା ଜାଣିଲେ ଆପଣଙ୍କ ଆଖି ବି ଟେରା ହୋଇଯିବ ।
ଭିଜିଲାନ୍ସ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ପ୍ରଭାସ କୁମାର ପ୍ରଧାନ ଓ ତାଙ୍କ ପରିବାର ଲୋକଙ୍କ ନାଁରେ ୮୫ଟି ପ୍ଲଟ୍ ଅଛି । ସେଥିରୁ ୮୦ଟି କେବଳ ଜଳେଶ୍ୱରରେ ଅଛି । ୪ଟି ପୁରୀ ଜିଲ୍ଲାର ଡେଲାଙ୍ଗରେ ଥିବା ବେଳେ ଗୋଟିଏ ପଶ୍ଚିମବଙ୍ଗର ସୁନାକନିଆରେ ଅଛି । ଏସବୁ ପ୍ଲଟ୍ର ସେଲ୍ ଡିଡ୍ ମୂଲ୍ୟ ୨.୦୭ କୋଟି ଟଙ୍କାରୁ ଅଧିକ । ତେବେ ଏଗୁଡ଼ିକର ପ୍ରକୃତ ମୂଲ୍ୟ ଆହୁରି ଅଧିକ ହେବ ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି ।
ଜଳେଶ୍ୱରରେ ପ୍ରଧାନଙ୍କର ଏକ ୫ ମହଲା କୋଠା ଅଛି । ପ୍ରାୟ ୧୨ ହଜାର ୫ ଶହ ବର୍ଗଫୁଟ୍ ଅଞ୍ଚଳରେ ଏହି ୫ ମହଲା କୋଠା ନିର୍ମିତ ହୋଇଛି । ସେହିପରି ଜଳେଶ୍ୱରର ଗୋବରା ଘାଟରେ ତାଙ୍କର ଏକ ମାର୍କେଟ କମ୍ପ୍ଲେକ୍ସ ଓ ଲେବର ଶେଲଟର ଶେଡ୍ ଅଛି, ଯାହା ୬୧୫୧ ବର୍ଗଫୁଟ୍ ଜାଗାରେ ନିର୍ମିତ ହୋଇଛି । ଭିଜିଲାନ୍ସର ବୈଷୟିକ ଶାଖା ପକ୍ଷରୁ ସମସ୍ତ ପ୍ଲଟ୍ ଓ କୋଠାର ମାପଚୁପ ଓ ମୂଲ୍ୟାୟନ ଜାରି ରହିଛି ।
ଚଢ଼ାଉ ବେଳେ ତାଙ୍କ ଘରୁ ନଗଦ ୧୧ ଲକ୍ଷ ୭୦ ହଜାର ୯୮୦ ଟଙ୍କା ମିଳିଛି । ଏହାସହ ୩୩୪.୫୫ ଗ୍ରାମର ସୁନା ଅଳଙ୍କାର ମିଳିଛି । ସେଥିରେ ଗୋଟିଏ ସୁନା ବିସ୍କୁଟ ରହିଛି । ବ୍ୟାଙ୍କ, ପୋଷ୍ଟାଲ ଓ ବୀମା ଜମା ବାବଦକୁ ସେ ୭୮ ଲକ୍ଷ ୨ ହଜାର ୭୭୯ ଟଙ୍କା ରଖିଛନ୍ତି । ତାଙ୍କର ଗୋଟିଏ ଚାରି ଚକିଆ ଓ ଗୋଟିଏ ଦୁଇ ଚକିଆ ଗାଡ଼ି ଅଛି । ତାଙ୍କ ଘରର ଆସବାବପତ୍ରର ମୂଲ୍ୟ ୬.୬୩ ଲକ୍ଷ ଟଙ୍କାରୁ ଅଧିକ ହେବ । ପ୍ରଭାସ ଏତେ ପରିମାଣରେ ସଂପତ୍ତି କେମିତି ଠୁଳ କଲେ, ସେ ନେଇ ତାଙ୍କୁ ପଚରାଉଚରା କରାଯାଉଛି । ଏହା ସହି ଚଢ଼ାଉ ଜାରି ରହିଥିବା ବେଳେ ମହାଶୟଙ୍କ ପେଡିରୁ ଆଡୁରି ବହୁ ଗୁପ୍ତଧନ ବାହାରିବାର ସମ୍ଭାବନା ରହିଛି ।