ଆଜି ଦ୍ଵିତୀୟ କ୍ଵାଲିଫାୟର, ମୁମ୍ବାଇ ଇଣ୍ଡିଆନ୍ସ ଏବଂ ଗୁଜରାଟ୍ ଟାଇଟନ୍ସ ମଧ୍ୟରେ ହେବ କଡ଼ା ମୁକାବିଲା

ନୂଆଦିଲ୍ଲୀ: ଗୁଜରାଟ ଟାଇଟନ୍ସ ଏବଂ ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଆଇପିଏଲ୍ ୨୦୨୩ର ଦ୍ଵିତୀୟ କ୍ଵାଲିଫାୟର ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବ। ଏହି ମ୍ୟାଚ୍ ପରେ ଚଳିତ ଆଇପିଏଲର ଦୁଇ ଫାଇନାଲିଷ୍ଟର ଚିତ୍ର ସ୍ପଷ୍ଟ ହୋଇଯିବ। ପ୍ରଥମ କ୍ଵାଲିଫାୟର ମ୍ୟାଚ୍ ଜିତି ଧୋନୀଙ୍କ ଚେନ୍ନାଇ ସୁପର କିଙ୍ଗ୍ସ ଫାଇନାଲରେ ପହଞ୍ଚି ସାରିଛି। ଆଜି ଖେଳାଯିବାକୁ ଥିବା ଦ୍ଵିତୀୟ କ୍ଵାଲିଫାୟରର ବିଜେତା ମେ ୨୮ରେ ଚେନ୍ନାଇକୁ ଭେଟିବ।

ଆଇପିଏଲ୍ ୨୦୨୩ର ପଏଣ୍ଟ ଟେବୁଲରେ ଶୀର୍ଷରେ ଥିବା ଗୁଜରାଟ୍ ଟାଇଟନ୍ସ ପ୍ରଥମ କ୍ଵାଲିଫାୟର ମ୍ୟାଚରେ ଚେନ୍ନାଇ ହାତରୁ ୧୫ ରନରେ ପରାସ୍ତ ହୋଇଛି। ଚେନ୍ନାଇ ବିପକ୍ଷରେ ଦଳର ବ୍ୟାଟିଂ ଏବଂ ବୋଲିଂ ବହୁତ ଫିକା ନଜର ଆସିଥିଲା। ଦଳର ମଧ୍ୟକ୍ରମ ବ୍ୟାଟିଂ ଭୁଶୁଡ଼ି ପଡ଼ିଥିଲା। ଦଳ ପାଇଁ ବଡ଼ ଆଶ୍ଵସ୍ତିକର ଖବର ଶୁଭମନ ଗିଲ୍ ଜବରଦସ୍ତ ଫର୍ମରେ ଅଛନ୍ତି। ଗୁଜରାଟ ନିକଟରେ ଲଗାତାର ଦ୍ଵିତୀୟ ଥର ଫାଇନାଲ୍ ଖେଳିବାର ଏହା ଶେଷ ସୁଯୋଗ।

ଅନ୍ୟପଟେ ମୁମ୍ବାଇ ଇଣ୍ଡିଆନ୍ସ ଶିବିର ଉତ୍ସାହରେ ଭରି ରହିଛି। ୫ ଥରର ଚାମ୍ପିଅନ ଏମଆଇର ସିଜିନରେ ଆରମ୍ଭ ଆଦୌ ଭଲ ନଥିଲା। କିନ୍ତୁ ଟୁର୍ଣ୍ଣାମେଣ୍ଟର ଦ୍ଵିତୀୟାର୍ଦ୍ଧରେ ଦଳ ଯେଉଁଭଳି ପ୍ରତ୍ୟାବର୍ତ୍ତନ କଲା ତାହା ମୁମ୍ବାଇର ୫ ଥରର ଚାମ୍ପିଅନକୁ ଦର୍ଶାଇଛି। ଏଲିମିନେଟର ମୁକାବିଲାରେ ଦଳର ସମସ୍ତ ଖେଳାଳି ଉଭୟ ବ୍ୟାଟ୍ ଏବଂ ବୋଲିଂରେ ଉଲ୍ଲେଖନୀୟ ଯୋଗଦାନ ଦେଇଥିଲେ। ତେଣୁ ଦଳ ଏହାକୁ ବଜାୟ ରଖି କ୍ଵାଲିଫାୟର-୨ ଜିତିବାକୁ ଲକ୍ଷ୍ୟ ରଖିଛି।

ଗୁଜରାଟ ଏବଂ ମୁମ୍ବାଇ ମଧ୍ୟରେ ଏ ପର୍ଯ୍ୟନ୍ତ ଆଇପିଏଲରେ ୩ଟି ମୁକାବିଲା ଖେଳାଯାଇଛି। ଏଥିରୁ ଦୁଇ ଥର ମୁମ୍ବାଇ ଜିତି ନିଜର ଦବଦବା ବଜାୟ ରଖିଛି। ଆଇପିଏଲ୍ ୨୦୨୩ରେ ଉଭୟ ଦଳ ପରସ୍ପରକୁ ଥରୁଟିଏ ଲେଖାଏଁ ହରାଇବାରେ ସଫଳ ରହିଛନ୍ତି। ଏମିତିରେ ଆଜି ଗୁଜରାଟ୍ ଏବଂ ମୁମ୍ବାଇ ମଧ୍ୟରେ କଡା ଟକ୍କର ଦେଖିବାକୁ ମିଳିପାରେ। ଗୁଜରାଟ୍ ପ୍ରଥମ କ୍ଵାଲିଫାୟର ପରାଜିତ ହୋଇଥିଲେ ହେଁ ଦଳ ଉଭୟ ବିଭାଗରେ ବେଶ ସନ୍ତୁଳନ ରହିଛି। ଅନ୍ୟପଟେ ମୁମ୍ବାଇକୁ ପ୍ଲେ ଅଫ ରାଉଣ୍ଡରେ ଖେଳିବାର ବେଶ ଅନୁଭବ ରହିଛି।